រដូវកាលភ្លៀងធ្លាក់បានមកដល់កម្ពុជាយើងហើយនៅក្នុងខែនេះ ដូច្នេះតម្រូវឲ្យប្រជាកសិករ ដែលអាស្រ័យដោយធ្វើការចិញ្ចឹមសត្វមាន់យល់ដឹងក្នុងការថែទាំសុខភាពសត្វមាន់របស់ពួកគេឲ្យរក្សានៅសុខភាពល្អ។
វិធីសាស្ត្រមួយចំនួនធំត្រូវបានកសិដ្ឋានតូចធំនៅបរទេសអនុវត្តដើម្បីរក្សាសុខភាពសត្វមាន់ឲ្យមានសុខភាពល្អ ដែលតិចនិកអាចជួយដល់កសិដ្ឋានតូចធំនៅកម្ពុជាជាច្រើនដែលចិញ្ចឹមមាន់។
ដូចដែលប្រជាកសិករទាំងអស់បានដឹង សត្វមាន់ជាសត្វដែលចូលចិត្តដើរហើរមានសេរីភាព មិនថាក្នុងស្ថានភាពរដូវកាលណានោះទេ ប៉ុន្តែសត្វទាំងនោះក៏ចូលចិត្តមានជម្រកច្បាស់លាស់ ដែលពួកគេអាចស៊ាំនឹងការរស់នៅផងដែរ។
យ៉ាងណានៅក្នុងរដូវកាលភ្លៀងបែបនេះ សត្វមាន់អាចនឹងឆាប់ខូចសុខភាព និងមានជំងឺច្រើនព្រោះតែទម្លាប់របស់ពួកវា បូកផ្សំនឹងលក្ខខណ្ឌក្នុងការរស់នៅ និងថែទាំ។
ទម្លាប់របស់សត្វនេះគឺចូលចិត្តដើរហើរ ដូច្នេះនៅក្នុងរដូវភ្លៀងនេះ ពួកវានឹងទទួលរងទឹកជោកជាំ ដែលធ្វើឲ្យពួកវានឹងទទួលរងអាការគ្រុនរងារ។ មួយវិញទៀត សត្វមាន់ក៏ចូលចិត្តផឹកទឹកផងដែរ ជាពិសេសទឹកផុកនេះតែម្ដង ដោយរដូវភ្លៀងសម្បូរទៅហើយផុកជោកជាំ រួមទាំងសត្វនេះដើរហើរពាសវាលពាសកាស ដូច្នេះធ្វើឲ្យសត្វនេះងាយរងជំងឺ បាក់តេរីនានាព្រោះតែទឹកផុកនេះ។
មួយវិញទៀតទ្រុងមាន់ ដែលជាជម្រករបស់សត្វមាន់នេះតែងតែស្អុយនៅក្នុងរដូវភ្លៀងនេះ ដែលជាកត្តាមួយធ្វើឲ្យមាន់ប៉ះពាល់សុខភាព បង្កជាជំងឺ ប៉ះពាល់ការបញ្ចេញពងផងដែរ។
ទោះជាពិបាកក្នុងការគ្រប់គ្រងថែទាំយ៉ាងណាក៏ដោយប៉ុន្តែ វិធីសាស្ត្រមួយចំនួនធំ ដែលអាចជួយដល់អ្នកចិញ្ចឹមមាន់ទាំងអស់អាចធ្វើការគ្រប់គ្រង និងចិញ្ចឹមមាន់នេះឲ្យនៅតែទទួលបានសុខភាពទោះជាស្ថានភាពយ៉ាងណាក៏ដោយ។
អ្នកចិញ្ចឹមសត្វមាន់ត្រូវតែឲ្យសត្វមាន់ ដើរហើរចេញពីទ្រុងរបស់ពួកវា ទោះមានភ្លៀងញឹកញាប់យ៉ាងណាក៏ដោយ ព្រោះតែសកម្មភាពនេះអាចជួយឲ្យពួកវាបាត់ធុញ និងបន្ធូរភាពតានតឹង ព្រោះតែទម្លាប់សត្វមាន់គឺចូលចិត្តមានសេរីភាព។
ម្ចាស់ដែលចិញ្ចឹមមាន់ត្រូវតែធ្វើយ៉ាងណាមើលថែទាំងចំណី និងទឹក ដែលសត្វមាន់ផឹក ឲ្យបានត្រឹមត្រូវ ជៀសវាងចំណី និងទឹករបស់ពួកវាពីផុកឲ្យបានច្រើនគឺល្អប្រសើរ។
អ្វីដែលសំខាន់បំផុតគឺត្រូវតែសម្អាតទ្រុងមាន់ឲ្យបានញឹកញាប់ ជៀសវាងទ្រុងមានក្លិន សល់កាកលាមក កាកសំណល់ចំណីអាហារផ្សេងៗ។
ចំណុចទាំងនេះត្រូវតែអនុវត្តជាចាំបាច់ក្នុងការថែទាំសត្វមាន់ឲ្យមានសុខភាពល្អ ក្នុងរដូវភ្លៀងនេះ៕
ប្រភព៖ Dineachook