ការថែទាំកូនគោទើបនឹងកើតបានត្រឹមត្រូវ គឺជាកត្តាគន្លឹះដែលធានានូវអត្រារស់រានមានជីវិតខ្ពស់ និងការលូតលាស់ល្អ។ កសិករត្រូវយកចិត្តទុកដាក់លើដំណាក់កាលសំខាន់ៗចំនួនបួន គឺ ការថែទាំភ្លាមៗក្រោយកើត ការផ្តល់ចំណី ការថែទាំសុខភាព និងការផ្ដាច់ដោះ។
១. ការថែទាំភ្លាមៗក្រោយពេលកើត
នាទីដំបូងៗក្រោយកើតគឺសំខាន់បំផុតសម្រាប់កូនគោ ហើយម្ចាស់គោគួរដឹងរឿងទាំងនេះ។
- ពិនិត្យ និងសម្អាតផ្លូវដង្ហើម
- ត្រូវសម្អាតទឹករំអិលចេញពីច្រមុះ និងមាត់កូនគោភ្លាមៗ។
- អាចប្រើចំបើង ឬក្រណាត់ស្អាតជូតសម្អាតខ្លួនកូនគោឲ្យស្ងួតល្អ ដើម្បីជួយជំរុញចលនាឈាមរត់ និងការពារកុំឲ្យកូនគោរងា។
- ថែទាំទងផ្ចិត
- ត្រូវកាត់ទងផ្ចិតឲ្យនៅសល់ប្រវែងប្រហែល ៤ ទៅ ៥ សង់ទីម៉ែត្រ។
- ជ្រលក់ទងផ្ចិតនោះទៅក្នុងទឹកថ្នាំសម្លាប់មេរោគ ដើម្បីបង្ការការឆ្លងមេរោគចូលទៅក្នុងខ្លួនកូនគោតាមរយៈទងផ្ចិត។
២. ការគ្រប់គ្រងចំណីអាហារ
ចំណីអាហារក្នុងរយៈពេលប៉ុន្មានសប្តាហ៍ដំបូង គឺផ្អែកលើទឹកដោះរបស់មេគោ។
ក. ទឹកដោះដំបូង
ទឹកដោះដំបូង មានសារៈសំខាន់សម្រាប់អាយុជីវិតកូនគោ។ វាផ្ទុកទៅដោយថាមពល ប្រូតេអ៊ីន វីតាមីន និងជាពិសេស អង់ទីគ័រ (Antibodies) ដែលជួយការពារកូនគោពីជំងឺផ្សេងៗ។
កូនគោត្រូវទទួលបានទឹកដោះដំបូងឲ្យបានឆាប់រហ័សបំផុត ក្នុងរយៈពេល ២ ទៅ ៤ ម៉ោង ក្រោយពេលកើត។ បើអាច គួរឲ្យវាទទួលបានយ៉ាងហោចណាស់ ២លីត្រ ក្នុង៦ម៉ោងដំបូង។
ម្ចាស់គៅគួរទុកឲ្យកូនគោបៅទឹកដោះដំបូងពីមេគោដោយផ្ទាល់ ប្រសិនបើមេគោមានសុខភាពល្អ។ បើមិនដូច្នោះទេ ត្រូវជួយច្របាច់យកទឹកដោះឲ្យវាបៅ។
ខ. ការបំបៅទឹកដោះធម្មតា
ជាធម្មតា កូនគោអាចបៅទឹកដោះមេគោបានរហូតដល់វាមានអាយុ៦ទៅ៨សប្តាហ៍មុននឹងផ្តាច់ដោះ។
គ. ការបង្រៀនស៊ីចំណីរឹង
ចាប់ពីអាយុ ១សប្តាហ៍ឡើងទៅ ត្រូវចាប់ផ្តើមបង្រៀនកូនគោឲ្យស៊ីចំណីរឹង (ស្មៅទន់ៗ និងចំណីបំប៉នសម្រាប់កូនគោ) បន្តិចម្តងៗ។ការធ្វើបែបនេះគឺដើម្បីបន្ស៊ាំ និងជំរុញការលូតលាស់នៃក្រពះរបស់វា មុនពេលផ្តាច់ដោះ។ ដូចគ្នាដែរ កូនគោត្រូវការទឹកស្អាតសម្រាប់ផឹកគ្រប់ពេល។
៣. ការគ្រប់គ្រងសុខភាព និងការបង្ការជំងឺ
ការគ្រប់គ្រងសុខភាពត្រូវធ្វើឡើងជាប្រចាំដើម្បីធានាការលូតលាស់របស់កូនគោ។ អនាម័យក្រោលគឺជារឿងសំខាន់។ ក្រោលកូនគោត្រូវតែ ស្ងួត និងស្អាតជានិច្ច មានខ្យល់ចេញចូលល្អ ដើម្បីការពារជំងឺរាគរូស ដែលជាជំងឺបណ្ដាលឲ្យកូនគោងាប់ច្រើនបំផុតពេលនៅតូចៗ។
បន្ថែមពីនេះគួរចាប់ផ្តើមផ្តល់ថ្នាំទម្លាក់ព្រូនតាមការណែនាំរបស់ពេទ្យសត្វ នៅពេលកូនគោមានអាយុប្រហែ ៤-៦ សប្តាហ៍។
ដូចគ្នាដែរការចាក់វ៉ាក់សាំង ត្រូវអនុវត្តកម្មវិធីចាក់វ៉ាក់សាំងការពារជំងឺឆ្លងទូទៅ ដូចជាជំងឺអុតក្តាម តាមកាលកំណត់ដោយពេទ្យសត្វ។
៤. ការផ្តាច់ដោះ
ពេលវេលាត្រឹមត្រូវសម្រាប់ផ្តាច់ដោះគឺនៅពេលកូនគោមានអាយុប្រហែល ២ទៅ៣ខែ ឬនៅពេលវាអាចស៊ីចំណីរឹងបានយ៉ាងតិច ០,៧ គីឡូក្រាមក្នុងមួយថ្ងៃ សម្រាប់រយៈពេល៣ថ្ងៃជាប់ៗគ្នា។ ការផ្តាច់ដោះលឿន ជួយឲ្យមេគោឆាប់រកឈ្មោលសារជាថ្មី និងអាចមានលទ្ធភាពបង្កើតកូនម្តងទៀតបានលឿន។
ចំណាំ៖ ការញែកកូនគោចេញពីមេនៅពេលថ្ងៃ ហើយបំបែកចេញពីក្រោលមេគោនៅពេលយប់ អាចជាវិធីល្អមួយដើម្បីបំបាត់ទម្លាប់បៅរបស់កូនគោ។ ចែករលែកបទពិសោធចិញ្ចឹមគោជាមួយកសិ/Kakse ផ្ញើព័ត៌មានចូលប្រអប់សារហ្វេសប៊ុកផេកកសិ។
ដោយ៖ ទូច សុខា
ប្រភព៖ Dairy Knowledge