ដំណាំស្រូវ ជាដំណាំគោលនិងជាដំណាំស្បៀងដ៏សំខាន់សម្រាប់ប្រជាជនកម្ពុជា។ ជាការពិត ពីមួយឆ្នាំទៅមួយឆ្នាំ មួយរដូវទៅមួយរដូវ កសិករតែងតែធ្វើស្រែវិលជុំ ដោយខ្លះធ្វើបាន២ទៅ៣ដងក្នុងមួយឆ្នាំ អាស្រ័យទៅលើលទ្ធភាពទឹកក្នុងតំបន់។
ដាំណាំស្រូវក៏ជាប្រភេទដំណាំដែលស្រូបយកសារធាតុអាសូតយ៉ាងច្រើនពីក្នុងដី។ ដូចនេះការដែលដាំដុះដំណាំស្រូវវិលជុំពីមួយរដូវហើយមួយរដូវទៀតដោយពុំមានការផ្លាស់ប្ដូរដំណាំនៅលើផ្ទៃដី នោះវាប្រឈមទៅនឹងការបាត់បង់អាសូត សារធាតុចិញ្ចឹមដូចៗគ្នាជាបន្តបន្ទាប់និងបង្ករឲ្យទិន្នផលមានការធ្លាក់ចុះទៀតផង ដែលនេះក៏ជាមូលហេតុនៃការកើនឡើងនូវការប្រើប្រាស់ជីគីមីផងដែរ។
ក្នុងដំណើរការផលិតកម្មដំណាំស្រូវ អាសូតនិងសារធាតុចិញ្ចឹមផ្សេងៗអាចបាត់បង់តាមរយៈ ការស្រូបយករបស់ស្រូវ ការប្រមូលផល(សារធាតុខ្លះមកតាមដើមនិងគ្រាប់របស់ស្រូវ) ការបំភាយទៅកាន់បរិយាកាស និងមួយចំណែកធំទៀតគឺការបាត់បង់តាមរយៈការដុតស្រែដើម្បីបំផ្លាញនូវពពួកជញ្ច្រាំងនិងស្មៅ ផ្សេងៗ។
ដូច្នេះបើសួរថា តើគួរដាំដំណាំគម្របដីឬដំណាំបង្វិលលើផ្ទៃដីដាំស្រូវដែរឬទេ ចម្លើយគឺប្រាកដណាស់។ តែតាមជាក់ស្ដែង កសិករភាគច្រើនមិនបានគិតដល់ចំនុចនេះទេ ទើបធ្វើឲ្យការអនុវត្តនេះត្រូវបានគេមើលរំលង។
ចូលរួមស្ដារនិងរក្សារគុណភាពដីឡើងវិញតាមរយៈការដាំនូវដំណាំផ្សេងៗលើដីស្រែរបស់បងប្អូន ដើម្បីជួយកាត់បន្ថយការស្រូបយកសារធាតុចិញ្ចឹមដដែលៗ និងផ្ដល់ឲ្យដីវិញនូវសារធាតុចិញ្ចឹម។ ដំណាំបង្វិលទាំងនោះបងប្អូនអាចដាំដូចជាពពួកសណ្ដែក ត្រសក់ ឬឪឡឹកជាដើម។ ក្រៅពីជួយដល់គុណភាពដីហើយ នៅបានជាទិន្នផលសម្រាប់ហូប ឬលក់ដូរទៀតផង។
បងប្អូនកសិករយើងមានទម្លាប់ដាំដំណាំអ្វីក្រោយប្រមូលផលស្រូវរួច?
ចែករំលែកដោយ៖ ទូច ស្រីនាថ
ប្រភព៖ MDPI