ការដាំដុះដំណាំបន្លែស្លឹក ដូចជា ស្ពៃ ត្រកួន ជី ខ្ទឹម ឬសាលាដ៍ ទាមទារការយកចិត្តទុកដាក់ខ្ពស់លើការប្រើប្រាស់ជី។ ការដាក់ជីត្រឹមត្រូវ តាមពេលវេលា និងតាមប្រភេទជី គឺជាគន្លឹះដើម្បីទទួលបានផលច្រើន ស្លឹកស្រស់ល្អ និងមានគុណភាពខ្ពស់។
១. ប្រភេទជីដែលត្រូវប្រើប្រាស់
ដំណាំបន្លែស្លឹកត្រូវការជាចាំបាច់នូវសារធាតុចិញ្ចឹមសំខាន់ៗទាំងបី NPK ប៉ុន្តែត្រូវផ្តោតខ្លាំងលើ អាសូត (N)។
អាសូតមាននាទីជំរុញការលូតលាស់ស្លឹក និងដើម ធ្វើឲ្យស្លឹកមានពណ៌បៃតងស្រស់ និងធំធាត់លឿន។ ប្រភពរបស់អាសូតយើងអាចរកបានពីជីអ៊ុយរ៉េ។ ចំណែកផូស្វ័រ ពង្រឹងឫស ឲ្យរឹងមាំ និងជួយដល់ការបែងចែកកោសិកាដំបូង។ យើងអាចរកបានពីជីដេអាប៉េ ដោយប្រើនៅដំណាក់កាលដាំដុះដំបូង។ ដោយឡែកប៉ូតាស្យូម ជួយបង្កើនភាពធន់របស់ដំណាំទៅនឹងជំងឺ និងជួយសម្រួលការស្រូបយកសារធាតុចិញ្ចឹម។ យើងបានរកប៉ុតាស្យូមបាននៅក្នុងជីទោល ឬជីសមាស។
ក្រៅពីជីទាំងនេះ ជីសរីរាង្គក៏សំខាន់សម្រាប់ដំណាំបន្លែស្លឹកដែរ។ ជីប្រភេទនេះជួយឲ្យដីធូរ មានជីវជាតិ និងកាត់បន្ថយការប្រើជីគីមី។ ប្រភពជីធម្មតាជាតិបានពីជីលាមកសត្វកែច្នៃ (មាន់ គោ) ឬជីកំប៉ុស្ត។
២. ពេលវេលា និងដំណាក់កាលដាក់ជីត្រឹមត្រូវ
ការដាក់ជីលើដំណាំបន្លែស្លឹកត្រូវបែងចែកជា ៣ ដំណាក់កាលសំខាន់ៗ៖
ក. ដំណាក់កាលរៀបចំដី (មុនដាំ)
- គោលបំណង៖ បង្កើនជីវជាតិដី និងពង្រឹងឫសដំបូង។
- ប្រភេទជី៖ ប្រើ ជីសរីរាង្គ (លាមកសត្វកែច្នៃ ឬជីកំប៉ុស្ត) លាយជាមួយដី។ អាចបន្ថែម ជីដេអាប៉េ (DAP) ជាប្រភពផូស្វ័រ បន្តិចបន្តួចនៅបាតរង ឬលាយក្នុងដី។
- របៀបដាក់៖ បាចជីសរីរាង្គឲ្យសព្វរួចភ្ជួរ ឬលាយជាមួយដីដើម្បីឲ្យដីមានជីវជាតិគ្រប់គ្រាន់មុននឹងចាប់ផ្តើមដាំ។
ខ. ដំណាក់កាលលូតលាស់ដំបូង (៥-១០ ថ្ងៃក្រោយដាំ)
- គោលបំណង៖ ជំរុញឲ្យដំណាំដុះលាស់លឿន និងចាប់ផ្ដើមលូតលាស់ស្លឹក។
- ប្រភេទជី៖ ប្រើ ជីអាសូត (N) ខ្ពស់ (ដូចជា ជីអ៊ុយរ៉េ) ឬជីសមាសដែលមានរូបមន្តផ្តោតលើ N (ឧទាហរណ៍: 20-10-10)។
- របៀបដាក់:
- ដាក់ជីក្នុងបរិមាណតិចតួច នៅចម្ងាយ ៥-១០ សង់ទីម៉ែត្រពីគល់ដំណាំ (កុំឲ្យប៉ះគល់ផ្ទាល់ ព្រោះវាអាចធ្វើឲ្យរលាកគល់ងាប់ដំណាំ)។
- ប្រសិនបើប្រើវិធី បាញ់តាមស្លឹក (Foliar Feeding) ត្រូវប្រើជីរាវដែលមាន N ខ្ពស់ ហើយបាញ់នៅពេលព្រឹកព្រលឹម ឬពេលល្ងាច។
គ. ដំណាក់កាលលូតលាស់ទីពីរ (១៥-២៥ ថ្ងៃមុនប្រមូលផល)
- គោលបំណង៖ បង្កើនទំហំស្លឹកឲ្យធំ និងរក្សាពណ៌បៃតងស្រស់។
- ប្រភេទជី៖ បន្តប្រើជីអាសូត (N) បូកផ្សំជាមួយ ប៉ូតាស្យូម (K) បន្តិចបន្តួច។ ជីសមាស (ឧទាហរណ៍: 15-5-20) ក៏អាចប្រើបានដែរ។
- របៀបដាក់៖
- ដាក់ជីនៅចន្លោះជួរ ឬគល់ដំណាំ រួចស្រោចទឹកដើម្បីឲ្យជីរលាយ ហើយដំណាំអាចស្រូបយកបានល្អ។
- សម្រាប់ដំណាំស្លឹកខ្លះ ដូចជា ត្រកួន ឬជីរ អាចបន្តដាក់ជីអាសូតបានម្តងទៀត បន្ទាប់ពីប្រមូលផលលើកទីមួយរួច។
៣. ចំណុចសំខាន់ដែលត្រូវចងចាំ
- កុំដាក់ជីខ្លាំងពេក៖ ការប្រើជីអាសូតច្រើនពេក អាចធ្វើឲ្យដំណាំលូតលាស់រហ័ស ប៉ុន្តែខ្សោយ ងាយឆ្លងជំងឺ ឬអាចធ្វើឲ្យរលាកស្លឹក។ យើងត្រូវប្រើក្នុងកម្រិតសមស្របតាមការណែនាំលើកញ្ចប់ជី។
- ស្រោចទឹកបន្ទាប់ពីដាក់ជី៖ ត្រូវស្រោចទឹកភ្លាមៗ បន្ទាប់ពីដាក់ជីគ្រាប់ ដើម្បីឲ្យជីរលាយ និងជ្រាបចូលទៅក្នុងដីឫសដំណាំស្រូបបានល្អ។
- ឈប់ដាក់ជីមុនពេលប្រមូលផល៖ ត្រូវបញ្ឈប់ការដាក់ជីគីមី យ៉ាងហោចណាស់ ៧ ទៅ ១០ ថ្ងៃ មុនពេលចាប់ផ្តើមប្រមូលផល ដើម្បីធានាថាផលិតផលមានសុវត្ថិភាពសម្រាប់អ្នកបរិភោគ។
- ពេលល្អបំផុតក្នុងការដាក់ជី៖ ដាក់ជីនៅពេលព្រឹកព្រលឹម ឬពេលល្ងាច ដែលជាពេលសីតុណ្ហភាពចុះត្រជាក់ ដើម្បីកាត់បន្ថយការបាត់បង់អាសូត និងជៀសវាងការរលាកស្លឹកដោយសារកម្ដៅថ្ងៃ។
ចែករំលែកដោយ៖ ចាន់ តារា
ប្រភព៖ Hebei Sanyuanjiuqi Fertilizer