សាលាដគឺជាបន្លែមួយប្រភេទដែលមានការពេញនិយមបរិភោគជាខ្លាំង។ សាលាដសម្បូរទៅដោយវីតាមីនA ដែលជាតម្រូវការចាំបាច់សម្រាប់សុខភាពរបស់អ្នកបរិភោគ។
សព្វថ្ងៃនេះចំនួនអ្នកបរិភោគសាលាដមានការកើនឡើង អត្រានៃការដាំសាលាដក៏មានច្រើនឡើងផងដែរ។
នៅពេលដែលយើងទិញសាលាដពីទីផ្សារ តើធ្លាប់ទិញប៉ះសាលាដដែលមានរសជាតិល្វីងដែរឬទេ?
បញ្ហាសាលាដមានរសជាតិល្វីងគឺជាបញ្ហាដែលធ្វើឲ្យអ្នកដាំមានការពិបាកចិត្តយ៉ាងខ្លាំង ដោយសាររសជាតិនេះធ្វើឲ្យអ្នកទិញមិនអាចបរិភោគបាននោះទេ ដែលជាហេតុធ្វើឲ្យអ្នកដាំរងនូវការខាតបង់មិនអាចលក់ចេញបាន។
សាលាដមានរសជាតិល្វីងគឺអាចមកពីកត្តាមួយចំនួនដូចជា
- អាកាសធាតុក្ដៅ៖ សាលាដជាបន្លែដែលនិយមនូវភាពត្រជាក់ដូចនេះបើអាកាសធាតុក្ដៅពេកនឹងធ្វើឲ្យសាលាដប្តូររសជាតិទៅជាល្វីង
- កង្វះទឹក៖ ដូចដែលបានដឹងថា សាលាដនិយមភាពត្រជាក់ ដូចនេះការដែលស្រោចស្រពមិនគ្រប់គ្រាន់ក៏ជាកត្តារួមចំណែកនាំឲ្យសាលាដល្វីងដែរ។
- ខ្វះសារធាតុចិញ្ចឹម ឬលើសអាសូត៖ សាលាដការអាសូត ហើយតម្រូវការក៏ប្រែប្រួលទៅតាមរដូវដែរ។ ក្នុងរដូវក្ដៅសាលាដត្រូវការអាសូតប្រមាណ ១០០-១៤០គីឡូក្រាមក្នុងមួយហិកតា និងនៅរដូវត្រជាក់គឺប្រមាណ១៥០-១៨០គីឡូក្រាមក្នុងមួយហិកតា
ចុះបើសិនទិញប៉ះសាលាដល្វីង តើគួរបោះចោលមែនទេ?
តាមការស្រាវជ្រាវបានឲ្យដឹងថា នៅពេលទិញប៉ះសាលាដល្វីង យើងអាចយកវាត្រាំក្នុងទឹកត្រជាក់១០នាទី រួចស្រង់ចេញទុកឲ្យស្រស់ទឹក បន្ទាប់មកយកទៅទុកក្នុងទូរទឹកកក២-៣ម៉ោងមុននឹងយកមកញ៉ាំ នោះសាលាដនឹងលែងមានរសជាតិល្វីង។
ដូច្នេះ បើសិនជាទិញប៉ះសាលាដល្វីង កុំភ្លេចសាកល្បងវិធីនេះណា។
អត្ថបទដោយ៖ Kakse/កសិ
ប្រភព៖ Whittier Daily News