គម្រោង LOCAL PROUD (LP) បានចុះកិច្ចព្រមព្រៀងកសិកម្មតាមកិច្ចសន្យាប្រវត្តិសាស្ត្រចំនួន ៣០០តោន ជាមួយចំការកំពង់ល្ពៅ (CKL) ដើម្បីផ្គត់ផ្គង់ផលិតផលក្នុងស្រុកដែលមានសុវត្ថិភាព និងកាត់បន្ថយការពឹងផ្អែកលើការនាំចូលសម្រាប់ឆ្នាំ២០២៦។
កិច្ចព្រមព្រៀងនេះបានចុះហត្ថលេខាកាលពីថ្ងៃទី៣១ ខែតុលា ឆ្នាំ២០២៥ ក្រោមអធិបតីភាព និងជាសាក្សីដោយ លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង និងលោក ហ៊ុន វិទូ អគ្គនាយកសភាពាណិជ្ជកម្មខេត្តបាត់ដំបង។ កិច្ចព្រមព្រៀងនេះបានបង្ហាញពីការធ្វើពាណិជ្ជកម្មដំណាំតាសក់ផ្អែមស្រួយដំបូងគេបង្អស់របស់កម្ពុជា និងបានដាំដុះដោយជោគជ័យនៅលើទឹកដីខេត្តបាត់ដំបង ហើយក៏បានត្រៀមខ្លួនរួចជាស្រេចក្នុងការកាត់បន្ថយការពឹងផ្អែកលើផលិតផលនាំចូល។
CKL ក្រោមការដឹកនាំរបស់លោក ស្រី សំបាន ដែលជាស្ថាបនិក បានប្រើប្រាស់បច្ចេកវិទ្យា ផ្ទះសំណាញ់ឆ្លាតវៃធន់នឹងអាកាសធាតុ ដ៏ទំនើប ដើម្បីដាំដុះផ្លែតាសក់ផ្អែមស្រួយប្រកបដោយជោគជ័យជាលើកដំបូងក្នុងប្រទេសកម្ពុជាក្នុងទ្រង់ទ្រាយពាណិជ្ជកម្មនៅខេត្តបាត់ដំបង។
គោលបំណងនិងអត្ថប្រយោជន៍នៃកិច្ចព្រមព្រៀង៖
- គោលបំណង៖ ជំនួសការនាំចូល និងធានាថាអ្នកបរិភោគទទួលបានផលិតផលក្នុងស្រុកដែលមានសុវត្ថិភាព និងគុណភាពខ្ពស់ (ស្របតាមទស្សនវិជ្ជា “ពីកសិកម្មសុវត្ថិភាព ទៅកាន់អាហារសុវត្ថិភាព”)។
- អត្ថប្រយោជន៍:
- បង្កើនចំណូលកសិករ៖ LP បង្កើតទីផ្សារស្ថិរភាពសម្រាប់ដំណាំមានតម្លៃខ្ពស់។
- កាត់បន្ថយការចំណាយអ្នកប្រើប្រាស់៖ ផលិតផលក្នុងស្រុកមានតម្លៃសមរម្យជាងការនាំចូល។
- ធន់នឹងអាកាសធាតុ: បច្ចេកវិទ្យាផ្ទះសំណាញ់ធានាការផ្គត់ផ្គង់គុណភាពនិងបរិមាណបានទៀងទាត់ និងកាត់បន្ថយការប្រើប្រាស់គីមី។
លោក ស្រី សំបាន (ស្ថាបនិក CKL) មានប្រសាសន៍ថា៖ «យើងមានមោទនភាពដែលបានក្លាយជាអ្នកដំបូងគេ ហើយបានជួយកាត់បន្ថយការពឹងផ្អែកលើការនាំចូល។ បច្ចេកវិទ្យាផ្ទះសំណាញ់ធ្វើឲ្យអាជីវកម្មនេះមាននិរន្តរភាព និងអាចទុកចិត្តបានទាំងរាំងទាំងភ្លៀង។»
លោកស្រី ប៉ាន់ អម្រឹតធីតា នាយិកា LP មានប្រសាសន៍ដែរថា៖ «ភាពជាដៃគូ ៣០០តោននេះ គឺជាជំហានសំខាន់សម្រាប់សន្តិសុខស្បៀង និងមោទនភាពជាតិ។ យើងកំពុងកសាងអនាគតមួយដែលមានភាពធន់ និងនវានុវត្តន៍សម្រាប់កសិកម្មកម្ពុជា។»
LOCAL PROUD ឬហៅកាត់ថាភីអិល (LP) គឺជាគម្រោងអាជីវកម្មបែប ESG ក្រោមក្រុមហ៊ុន G.G.A Advisory Co., Ltd. ដែលមានចក្ខុវិស័យជំរុញវិស័យកសិកម្មកម្ពុជាទៅកាន់ទីផ្សារក្នុងស្រុក និងអន្តរជាតិ តាមរយៈការធ្វើទំនើបកម្មបច្ចេកវិទ្យាកសិកម្ម និងបង្កើតទីផ្សារឌីជីថល។