កសិករមិនតិចនាក់ទេ នៅពេលដែលដំណាំមិនលូតលាស់ និងបាត់បង់នូវទិន្នផល ពួកគាត់ជ្រើសរើសការដាក់ជីបន្ថែម ដោយពីមួយឆ្នាំទៅមួយឆ្នាំ កម្រិតនៃការប្រើប្រាស់នូវជីក៏កាន់តែកើនឡើង។
តើបងប្អូនកសិករយើងដឹងទេថា ការប្រើប្រាស់នូវជីគីមីច្រើនពេកវាមិនត្រឹមតែកើនឡើងថ្លៃដើមផលិតនោះទេ តែវាក៏នឹងបណ្ដាលឲ្យមានបញ្ហាជាច្រើនទៀតកើតឡើងដែរ។
ការប្រើប្រាស់ជីគីមីច្រើនលើសកម្រិតនឹងធ្វើឲ្យរុក្ខជាតិក្ដៅ ដែលអាចខ្លោចដើម និងបាត់បង់នូវទិន្នផល។ ដូច្នេះសូមកុំគិតថាឲ្យតែបន្ថែមកម្រិតជីទៅរុក្ខជាតិ ឬដំណាំនឹងកាន់តែល្អនោះអី។
ការប្រើជីគីមីលើសកម្រិត ក៏នឹងបណ្ដាលឲ្យដីបាត់បង់តុល្យភាពpHដី កើនឡើងនូវអាស៊ីត បើធ្ងន់ធ្ងរគឺឈានទៅដល់ការដែរដំណាំលែងលូតលាស់ទៀតផង។
ម្យ៉ាងវិញទៀត វាក៏រួមចំណែកធ្វើឲ្យ ប៉ះពាល់ប្រភពទឹក ជាពិសេសគឺទឹកក្រោមដី។ ការប្រើប្រាស់ជីគីមី ត្រូវធ្វើឲ្យត្រូវទៅតាមដំណាក់កាលរបស់ដំណាំ ដូចជាពេលដំណាំត្រូវការការលូតលាស់ ឬពេលដំណាំត្រូវចេញផ្លែផ្កាជាដើម។
យើងអាចកាត់បន្ថយការប្រើប្រាស់ជីគីមីបានតាមរយះការប្រើប្រាស់នូវជីធម្មជាតិ ដូចជាជាកំប៉ុស្ដជាដើម ដែលយើងអាចផលិតវាបានដោយវត្ថុធាតុដើមដែលយើងមានស្រាប់នៅក្នុងស្រុកភូមិ។ ប្រើប្រាស់ជីធម្មជាតិដើម្បីការពារបរិស្ថាន និងគុណភាពដីប្រើប្រាស់បានយូរអង្វែង។
បើបងប្អូនមិនច្បាស់ពីរបៀបប្រើប្រាស់ជីគីមីឲ្យបានត្រឹមត្រូវ កុំស្ទាក់ស្ទើរក្នុងការស្វែងរកជំនួយពីមន្ត្រីកសិកម្មឃុំ។
ចែករំលែកដោយ៖ ទូច ស្រីនាថ
ប្រភព៖ AZO LIFESCIENCE