កង្កែបជាអាហារសម្រាប់មនុស្ស និងរបស់សត្វមួយនួនផ្សេងទៀតដូចជាពស់ ស្វា ត្រី និងបក្សីផ្សេងទៀតជាដើម។ ក្រៅអ្វីដែលយើងបានដឹងទាំងនេះ តើកង្កែបមានផលប្រយោជន៍អ្វីផ្សេងទៀត? អ្នកសិក្សាលើអម្បូរកង្កែប និងល្មូន បានលើកឡើងថាកង្កែបមានគុណប្រយោជន៍ច្រើនជាងអ្វីដែលបានរៀបរាប់នេះទៅទៀត។
១. កង្កែបដើរតួសំខាន់ក្នុងច្រវាក់អាហារ
កង្កែបក្នុងមួយជីវិតរបស់ពួកវា បានរួមចំណែកសំខាន់ដល់ច្រវាក់អាហារទាំងសម្រាប់ពពួកសត្វរំពា (ពពួកសត្វដែលស៊ី និងបំផ្លាញ គេជាអាហារ) និងពពួកសត្វចំណី (ជាសត្វដែលពពួករំពាចាំស៊ីជាអាហារ)។
ពេលនៅជាកូនក្អុក ពួកវាជួយស៊ីស្លែ ដែលជាការរួមចំណែកគ្រប់គ្រង និងកាត់បន្ថយកង្វក់បង្កឡើងដោយស្លែ។ កង្កែបក៏ជាប្រភពអាហារសំខាន់សម្រាប់ពួកបក្សី ត្រី ស្វា និងពស់ ផងដែរ។ ការបាត់បង់កង្កែបអាចរំខានដល់ទំនាក់ទំនងរបស់បណ្ដាញអាហារ ដែលអាចនាំឲ្យមានការធ្លាក់ចុះខ្លាំងនេះប្រព័ន្ធអេកូឡូស៊ី។
២. កង្កែបជួយកម្ចាត់សត្វល្អិតចង្រៃ
ដូចយើងដឹងហើយថាកង្កែបក៏ស៊ីសត្វល្អិតជាអាហារដែរ ដែលសត្វល្អទាំងនោះអាចបំផ្លាញដំណាំកសិកម្ម ឬក៏ជាភ្នាក់ងារចម្លងជំងឺផងដែរ។ កង្កែបស៊ីមូសជាអាហារ ហើយមូសមួយចំនួនដូចជាមូសខ្លា ឬមូសដែកគោល គឺជាភ្នាក់ងារចម្លងជំងឺគ្រុនឈាម និងជំងឺគ្រុនចាញ់។
យ៉ាងណាថ្វីបើកង្កែបបានរួមចំណែកច្រើនដល់បរិស្ថាន និងជីវិតក្ដី មកដល់ពេលនេះវត្តមានរបស់កង្កែបក៏កាត់តែខ្សត់ទៅផងដែរ។ កង្កែបមានវត្តមានលើផែនដីជិត ៣០០លានឆ្នាំមកហើយ ប៉ុន្តែពួកវាបានរងការគំរាមកំហែងពីជំងឺ មនុស្ស សត្វផ្សេងទៀត និងការប្រែប្រួលអាកាសធាតុ។ ចំនួនសត្វកង្កែប ឬអម្បូរកង្កែបមានការថយចុះជាខ្លាំងតាំងពីទសវត្សឆ្នាំ១៩៥០មក ហើយគេជឿថាមានអម្បូរកង្កែបប្រហែលជា១២០ប្រភេទបានផុតពូជតាំងពីទសវត្សឆ្នាំ១៩៨០មកម្លេះ។
ប្រភព៖ PHYS