ជំងឺដុំពកស្បែក គឺជាបញ្ហាធំមួយច្រើនជួបប្រទះ ពេលចិញ្ចឹមគោក្របី។ ជំងឺនេះកើតមានឡើងតាមរដូវកាលជាពិសេសនៅរដូវវស្សាដែលមានពពួកសត្វល្អិតច្រើន ដែលជាភ្នាក់ងារចម្លងមេរោគ។ ជំងឺដុំពកស្បែកបង្កឲ្យមានការខាតបង់ធ្ងន់ធ្ងរដល់ការចិញ្ចឹមគោក្របីដោយធ្វើឲ្យខូចស្បែក មានបញ្ហាបង្កកំណើត រលូតកូន ស្រកទម្ងន់ បរិមាណទឹកដោះថយចុះខ្លាំង និងក្នុងករណីខ្លះបង្កឲ្យសត្វងាប់តែម្ដង។
ភ្នាក់ងារចម្លងជំងឺនេះ មានដូចខាងក្រោម៖
- ភាគច្រើនឆ្លងតាមសត្វល្អិត ដូចជា មូស មាននៅក្នុងក្រោល។
- តាមរយៈការនាំគោក្របីដែលមានជំងឺពីតំបន់ផ្សេង។
- អាចឆ្លងតាមរយៈការស៊ីចំណី និងផឹកទឹករួមគ្នា ទឹកដោះ ការបង្កាត់ពូជ ការព្យាបាល បើមិនដូរម្ជុល ឬការប៉ះពាល់ផ្ទាល់។
រោគសញ្ញាជំងឺ រួមមាន៖
- សត្វក្ដៅខ្លួនខ្លាំងពី ៤០ ទៅ ៤១ អង្សាសេ លែងស៊ីចំណី និងបរិមាណទឹកដោះថយចុះ
- មានដុំពកលើស្បែករាងមូល រឹង ឬទន់ ប្រវែងពី ១ ទៅ ៥ ស.ម.
- ដុំពកអាចរាបទៅវិញទៅតាមការវិវត្តនៃជំងឺ ហើយក្លាយជាក្រមរ និងដំបៅជ្រៅនៅផ្នែកកណ្ដាល ដែលទាក់ទាញពពួកសត្វល្អិតដូចជាមូស និងរុយជាដើម
- ដំបៅមាត់ និងច្រមុះ និងបបូរមាត់
- ហៀរទឹករងៃចេញពីភ្នែកនិងច្រមុះ ហើយហូរទឹកមាត់ច្រើន។
ជំងឺនេះបង្កដោយវីរុសហើយពុំមានថ្នាំអាចព្យាបាលមានប្រសិទ្ធភាពទេ។ ការព្យាបាលបំបាត់រោគសញ្ញាអាចជួយបានដូចជា ការប្រើប្រាស់ថ្នាំបំបាត់ការឈឺចាប់ និងរលាក រួមផ្សំជាមួយថ្នាំផ្សះដើម្បីកម្ចាត់ពួកបាក់តេរីដែលឆ្លងចូលតាមក្រោយ។ ប្រឹក្សាជាមួយពេទ្យសត្វដើម្បីបានការព្យាបាលត្រឹមត្រូវ។
ទោះមិនទាន់មានថ្នាំព្យាបាល តែជំងឺនេះអាចបង្ការបានដោយការចាក់វ៉ាក់សាំង ដែលវ៉ាក់សាំងនេះមានលក្ខណៈសំខាន់ៗដូចតទៅ៖
- វ៉ាក់សាំងមានប្រសិទ្ធភាពអាចការពារបានបន្ទាប់ពីចាក់បាន៣សប្ដាហ៍។
- គួរចាក់វ៉ាក់សាំងឲ្យគោក្របី នៅមុនពេលដែលហ្វូងគោក្របីទាំងមូលឆ្លងជំងឺ
- អាចមានប្រតិកម្មតិចតួចក្រោយពេលចាក់រួចដូចជា ហើមនៅកន្លែងចាក់ តែមិនបង្កគ្រោះថ្នាក់នោះទេ និងអាចបាត់ទៅវិញក្នុងរយៈពេលពី ១ ទៅ២សប្ដាហ៍ ហើយមានគ្រុនក្ដៅរយៈពេលខ្លី៕
ចែករំលែកដោយ៖ សែន តុលា
ប្រភព៖ ឯកសារក្រសួងកសិកម្ម