កន្ធំថេតសម្បូរប្រូតេអ៊ីន​ល្អសម្រាប់មាន់និងទា

បងប្អូន​អ្នកចិញ្ចឹម​មាន់​ទេ! ក្រៅពីចំណីផ្សំ និងចំណីធម្មតាតើបងប្អូនធ្លាប់ស្គាល់ឬប្រើប្រាស់កន្ធំថេត (Leucaena leucocephala) ដើម្បីបង្កើនសុខភាព និងផលិតភាពមាន់ទារបស់បង​ប្អូនទេ?

កន្ធំថេត ជាប្រភេទរុក្ខជាតិលូតលាស់លឿន ហើយ​មិនត្រឹមតែជាចំណីបៃតងដ៏ល្អសម្រាប់គោក្របីប៉ុណ្ណោះទេ តែវាក៏មានសារប្រយោជន៍ជាច្រើនសម្រាប់មាន់ និងទាផងដែរ។

១. សារធាតុចិញ្ចឹមសំខាន់ៗរបស់កន្ធំថេត

កន្ធំថេត គឺជាប្រភពអាហារូបត្ថម្ភដ៏ប្រសើរដែលងាយរក និងមានតម្លៃទាប​។ វាមាន​ប្រូតេអ៊ីន​ខ្ពស់​។ ស្លឹកកន្ធំថេតផ្ទុកនូវជាតិប្រូតេអ៊ីនអាចដល់ទៅ ២០% ទៅ ២៥% នៃទម្ងន់ស្ងួត។ ជាតិប្រូតេអ៊ីននេះជួយឲ្យមាន់ទាលូតលាស់លឿន បង្កើតសាច់ និងស៊ុតបានល្អ។

ដូច​គ្នា​ដែរ​ស្លឹកកន្ធំថេតមានផ្ទុកជាតិខារ៉ូទីនខ្ពស់ ដែលជាសារធាតុដើមរបស់វីតាមីន A។ សារធាតុនេះជួយឲ្យ ពងមាន់មានពណ៌លឿងស្រស់ល្អ​គួរជាទីទាក់ទាញនៅលើទីផ្សារ។ ក្រៅពីនេះ​វាក៏សម្បូរទៅដោយវីតាមីនមួយចំនួន និងជាតិរ៉ែសំខាន់ៗផងដែរ។

២. ប្រយោជន៍​សម្រាប់​មាន់ និងទា

ក. ចំពោះមាន់ពង

ការបន្ថែមម្សៅស្លឹកកន្ធំថេតក្នុងចំណីជួយឲ្យស៊ុតមានពណ៌លឿងកាន់តែក្រហម ឬលឿងស្រស់ ដែលបង្កើនការពេញនិយមពីអ្នកទិញ។ ជាតិប្រូតេអ៊ីនខ្ពស់ ជួយទ្រទ្រង់ដល់ការផលិតពងជាប្រចាំ។

ខ. ចំពោះមាន់សាច់ និងទា

សារធាតុប្រូតេអ៊ីនជួយកសាងសាច់ដុំ ធ្វើឲ្យមាន់ទាលូតលាស់លឿន និងបង្កើនទម្ងន់។ ការប្រើស្លឹកកន្ធំថេតជំនួសឲ្យចំណីផ្សំមួយផ្នែក ជួយកាត់បន្ថយថ្លៃដើមផលិតកម្ម។

៣. វិធីប្រើប្រាស់កន្ធំថេតឲ្យមានប្រសិទ្ធភាព

ដើម្បីទទួលបានអត្ថប្រយោជន៍ពេញលេញពីកន្ធំថេត កសិករត្រូវដឹងពីរបៀបប្រើប្រាស់ត្រឹមត្រូវ ព្រោះវាមានផ្ទុកសារធាតុមួយឈ្មោះថា “ម៉ាយម៉ូស៊ីន (Mimosine)” ដែលអាចប៉ះពាល់ដល់សុខភាពសត្វ បើប្រើក្នុងបរិមាណច្រើនលើសលប់។

ចំណាំ៖ កុំប្រើលើសពី ៧% នៃចំណីសរុប។ បើប្រើច្រើនពេក អាចបណ្ដាលឲ្យមាន់ទាមានបញ្ហាដូចជា ជ្រុះរោម (ដោយសារតែជាតិម៉ាយម៉ូស៊ីន) និងអាចប៉ះពាល់ដល់ការលូតលាស់។

ជារួម​កន្ធំថេតជាជំនួយដ៏ល្អសម្រាប់បង្កើនប្រូតេអ៊ីន និងពណ៌ស៊ុត តែបងប្អូនត្រូវចងចាំពីកម្រិតកំណត់របស់វា។

ចែករំលែកដោយ៖ ចាន់ តារា
ប្រភព៖ Veterinary World