សម្រាប់ការដាំដុះស្វាយចន្ទី សារធាតុបូរុន គឺជាកត្តាកំណត់ដ៏សំខាន់នៃទិន្នផល ព្រោះវាជួយកាត់បន្ថយការជ្រុះផ្កា និងជួយឱ្យគ្រាប់ចន្ទីមានទម្ងន់ធ្ងន់។ ខាងក្រោមនេះគឺជាតារាងពេលវេលា និងបច្ចេកទេសបាញ់បូរុនតាមស្លឹកដែលត្រូវបានណែនាំដោយផ្អែកលើបច្ចេកទេសកសិកម្ម។
ពេលវេលាល្អបំផុតសម្រាប់បាញ់បូរុនលើស្វាយចន្ទី
ការបាញ់បូរុនមានប្រសិទ្ធភាពបំផុតគឺនៅដំណាក់កាលដែលរុក្ខជាតិរៀបចំផលិតផ្កា និងផ្លែ។
១. ដំណាក់កាលចេញត្រួយថ្មីនៅរង្វង់ខែវិច្ឆិកា – ធ្នូ ដែលការបាញ់នេះធ្វើឡើងដើម្បីពង្រឹងសុខភាពត្រួយ និងរៀបចំភ្នែកផ្កាឱ្យមានភាពរឹងមាំ។
២. មុនពេលផ្កាចាប់ផ្ដើមរីកនៅរង្វង់ខែធ្នូ-មករា ធ្វើឡើងដើម្បីជំរុញការលូតលាស់បំពង់លម្អងផ្កា និងបង្កើនគុណភាពលម្អង។
៣. ពេលផ្ការីកពេញលេញនៅមករា-កុម្ភៈ ដែលជាដំណាក់កាលសំខាន់បំផុតសម្រាប់ជួយឱ្យការបង្កកំណើតបានជោគជ័យ និងកាត់បន្ថយការជ្រុះផ្កា។
៤. ពេលផ្លែខ្ចី/គ្រាប់ចាប់ផ្តើមធំរង្វង់ខែកុម្ភៈ-មីនា ធ្វើឡើងដើម្បីការពារការប្រេះគ្រាប់ និងជួយឱ្យសាច់គ្រាប់ពេញល្អ មានទម្ងន់ធ្ងន់។ សូមប្រឹក្សាបន្ថែមជាមួយមន្ត្រីជំនាញកសិកម្មដើម្បីបានដឹងច្បាស់ពីពេលវេលាបាញ់បានត្រឹមត្រូវទៅតាមភូមិសាស្រ្តរបស់បងប្អូន។
បរិមាណ និងកម្រិតប្រើប្រាស់ក្នុងមួយហិកតា
យោងតាមការណែនាំបច្ចេកទេសពី Directorate of Cashew Research (DCR) និងស្ថាប័នកសិកម្មអន្តរជាតិ បរិមាណបូរុនដែលត្រូវប្រើគឺអាស្រ័យលើប្រភេទថ្នាំ ម្សៅ ឬទឹក។
- កម្រិតមធ្យមសម្រាប់បាញ់តាមស្លឹក៖ ប្រើប្រាស់សារធាតុបូរុន (ឧទាហរណ៍៖ Solubor ២០%) ក្នុងកម្រិត ១ ក្រាម ទៅ ១,៥ ក្រាម ក្នុងទឹក ១ លីត្រ។
- បរិមាណក្នុងមួយហិកតា៖
- ជាទូទៅ ការបាញ់ក្នុងមួយហិកតា (សម្រាប់ដើមពេញវ័យ) ត្រូវការទឹកចន្លោះពី ៤០០ ទៅ ៦០០ លីត្រ។
- ដូច្នេះ បរិមាណម្សៅបូរុនដែលត្រូវប្រើគឺប្រហែល ៤០០ ក្រាម ទៅ ៩០០ក្រាម ក្នុងមួយហិកតា សម្រាប់ការបាញ់ម្តងៗ។
- កំណត់ចំណាំ៖ មិនគួរប្រើលើសពី ១ គីឡូក្រាម នៃផលិតផលបូរុនក្នុងមួយហិកតាសម្រាប់ការបាញ់ម្តងនោះទេ ព្រោះវាអាចបង្កជាជាតិពុលដល់ស្លឹក។ សូមប្រឹក្សាជាមួយមន្ត្រីជំនាញផ្នែកកសិកម្មឲ្យបានច្បាស់លាស់មុននឹងប្រើប្រាស់។
អនុសាសន៍ស្ថាប័នជំនាញកសិកម្មមួយចំនួន
១. Directorate of Cashew Research (DCR)របស់ឥណ្ឌា៖ ស្ថាប័ននេះបានផ្តល់អនុសាសន៍ថា ការបាញ់បូរុន (Solubor ០,១%) រួមជាមួយកាល់ស្យូម ជួយបង្កើនការកាន់ផ្លែបានរហូតដល់ ២០-៣០% បើធៀបនឹងការមិនបានបាញ់។
២. University of Florida (IFAS Extension)៖ បានបញ្ជាក់ថា ស្វាយចន្ទីត្រូវការបូរុនដើម្បីដឹកជញ្ជូនជាតិស្ករទៅកាន់ផ្កា។ ប្រសិនបើខ្វះបូរុន លម្អងផ្កានឹងអសកម្ម ដែលធ្វើឱ្យកញ្ចុំផ្កាចេញមកច្រើនតែមិនមានគ្រាប់។
៣. CropNuts (ស្ថាប័នពិសោធន៍ដីអន្តរជាតិ)៖ បានសង្កត់ធ្ងន់ថា បូរុនមិនងាយធ្វើចលនានៅក្នុងរុក្ខជាតិទេ។ ដូច្នេះ ការបាញ់តាមស្លឹកនៅចំដំណាក់កាលផ្កា គឺមានប្រសិទ្ធភាពជាងការដាក់តាមដី ព្រោះវាបញ្ជូនសារធាតុចិញ្ចឹមទៅកាន់ផ្កាបានភ្លាមៗ។
ការប្រុងប្រយ័ត្នសម្រាប់បងប្អូនកសិករ
- កុំបាញ់ពេលថ្ងៃក្តៅខ្លាំង៖ ពេលវេលាល្អបំផុតគឺ ពេលព្រឹកព្រលឹម ឬ ពេលល្ងាចត្រជាក់ ដើម្បីជៀសវាងការខ្លោចស្លឹក និងដើម្បីឱ្យស្លឹកបឺតស្រូបបានល្អ។
- ការលាយថ្នាំ៖ បូរុនអាចលាយជាមួយថ្នាំសម្លាប់សត្វល្អិត (ដូចជាថ្នាំកម្ចាត់មូសតែ) បាន ប៉ុន្តែត្រូវលាយបូរុនក្នុងទឹកឱ្យរលាយអស់ជាមុនសិន សឹមដាក់ថ្នាំផ្សេងៗចូលតាមក្រោយ។
- pH ទឹក៖ ប្រសិនបើទឹកដែលបងប្អូនប្រើមានជាតិកំបោរខ្លាំង (pH ខ្ពស់) ប្រសិទ្ធភាពនៃបូរុននឹងថយចុះ។
ដោយ៖ ចាន់ តារា
ប្រភព៖ CropNuts / OMEX Agrifluids