កសិករយើងប្រហែលជាធ្លាប់ជួបករណីដំណាំចេញផ្កាច្រើន តែចុងក្រោយបែរជាជ្រុះអស់ឬមិនជាប់ផ្លែ ហើយនេះគែជាបញ្ហាដ៏សោកស្តាយបំផុតមួយ។ បញ្ហានេះមិនមែនកើតឡើងដោយចៃដន្យទេ ប៉ុន្តែវាមានមូលហេតុច្បាស់លាស់ដែលយើងអាចកែខៃបាន។
យោងតាមឯកសារបច្ចេកទេសរបស់ សាកលវិទ្យាល័យ Purdue (Purdue University) និងស្ថាប័នកសិកម្មអន្តរជាតិ ខាងក្រោមនេះគឺជាមូលហេតុចម្បងៗ និងដំណោះស្រាយ។
១. បញ្ហាបង្កាត់លម្អង
បញ្ហាលើការបង្កាត់លម្អងគឺជាមូលហេតុដំបូងគេបង្អស់មួយ។ ប្រសិនបើផ្កាមិនបានបង្កកំណើតទេ វានឹងជ្រុះទៅវិញក្នុងរយៈពេល ២-៣ ថ្ងៃ។
- មូលហេតុ៖ ខ្វះសត្វល្អិតជួយនាំលម្អងដូចជា ឃ្មុំ ឬមេអំបៅ។ ការប្រើប្រាស់ថ្នាំសម្លាប់សត្វល្អិតច្រើនហួសហេតុ ធ្វើឱ្យសត្វល្អិតមានប្រយោជន៍ទាំងនេះងាប់អស់។
- ដំណោះស្រាយ៖ កាត់បន្ថយការបាញ់ថ្នាំពុលនៅពេលព្រឹក ពេលឃ្មុំដើររកស៊ី។
- ដាំផ្កាចម្រុះជុំវិញចំការដើម្បីទាក់ទាញសត្វល្អិត។
- សម្រាប់ដំណាំខ្លះ ដូចជា ត្រសក់ ឪឡឹក អាចជួយលម្អងដោយដៃ។
២. កង្វះ ឬលើសសារធាតុចិញ្ចឹម
- លើសអាសូត (N)៖ ការដាក់ជីអ៊ុយរ៉េ ឬជីដែលមានអាសូតខ្ពស់ពេក ធ្វើឱ្យរុក្ខជាតិ បំប៉នស្លឹកជាងផ្កាផ្លែ។ វាបញ្ចេញថាមពលទាំងអស់ទៅចិញ្ចឹមស្លឹក និងមែក តែបែរជាបោះបង់ផ្កាចោល។
- ខ្វះផូស្វ័រ (P) ប៉ូតាស្យូម (K) និងបូរុន (B)៖ ទាំងនេះគឺជាធាតុគ្រឹះសម្រាប់បង្កើតផ្កា និងផ្លែ។ ជាពិសេសបូរុន បើខ្វះវា លម្អងផ្កានឹងមិនមានជីវិតដើម្បីបង្កកំណើតបានឡើយ។
- ដំណោះស្រាយ៖ កាត់បន្ថយជីអាសូតនៅពេលជិតចេញផ្កា ហើយបន្ថែមជីដែលមានជាតិប៉ូតាស្យូម និងបូរុន។
៣. ស្ត្រេសដោយសារអាកាសធាតុ
រុក្ខជាតិក៏ចេះតានតឹតដូចមនុស្សដែរនៅពេលជួបការប្រែប្រួលអាកាសធាតុខ្លាំងពេក៖
- កម្តៅខ្លាំង៖ សីតុណ្ហភាពលើសពី៣៥អង្សាសេអាចធ្វើឱ្យលម្អងផ្កាងាប់។
- ត្រជាក់ខ្លាំង ឬសន្សើមខ្លាំង៖ ភាពត្រជាក់ធ្វើឱ្យការវិវត្តផ្កានៅទ្រឹងមិនអាចបង្កាត់បាន។
- ដំណោះស្រាយ៖ ប្រើប្រាស់សំណាញ់បាំងកម្តៅបើដំណាំតិចតួច ឬការស្រោចទឹកដើម្បីកាត់បន្ថយកម្តៅក្នុងចំការ។
៤. ការគ្រប់គ្រងទឹកមិនត្រឹមត្រូវ
- មូលហេតុ៖ ការបណ្តោយឱ្យដីស្ងួតខ្លាំង រួចស្រោចទឹកជោកភ្លាមៗ ធ្វើឱ្យរុក្ខជាតិបន្សាំខ្លួនមិនទាន់និងជ្រុះផ្កា ឬការស្រោចទឹកច្រើនពេកបណ្តាលឱ្យរលួយឫសក៏ធ្វើឱ្យផ្កាជ្រុះដែរ។
- ដំណោះស្រាយ៖ ត្រូវរក្សាសំណើមដីឱ្យបានទៀងទាត់។ ចៀសវាងការស្រោចទឹកជោកជាំខ្លាំងនៅពេលល្ងាច ដែលអាចបង្កជាជំងឺផ្សិតលើផ្កា។
យោងតាមអង្គការ FAO (Food and Agriculture Organization) រុក្ខជាតិមានយន្តការការពារខ្លួន។ នៅពេលវាមានអារម្មណ៍ថាមិនមានសុវត្ថិភាព ដូចជាខ្វះទឹក ខ្វះអាហារ ឬក្តៅពេក វានឹងជ្រើសរើសការរស់រានរបស់ដើម ជាជាងការបង្កើតផ្លែផ្កា។ ដូច្នេះវាត្រូវតែជម្រុះផ្កាចោលដើម្បីសន្សំថាមពល។
ការចេញផ្កា គឺគ្រាន់តែជាដំណាក់កាលពាក់កណ្តាលផ្លូវនៃជោគជ័យប៉ុណ្ណោះ។ ដើម្បីបានផល បងប្អូនត្រូវធានាថាគ្មានសត្វល្អិតបំផ្លាញ មានសារធាតុចិញ្ចឹមគ្រប់ (ជាពិសេសបូរុន) និងទឹកទៀងទាត់។
ដោយ៖ ចាន់ តារា
ប្រភព៖ Home & Garden /Purdue University /FAO