ការគ្រប់គ្រងសត្វល្អិតចង្រៃ និងជំងឺលើដំណាំប៉េងប៉ោះ គឺជាកត្តាសំខាន់មួយក្នុងការរក្សាទិន្នផល និងគុណភាពផ្លែ។ កសិករត្រូវអនុវត្តវិធានការការពារ កាត់បន្ថយ និងកម្ចាត់សត្វល្អិត និងជំងឺឲ្យបានត្រឹមត្រូវ ដើម្បីបង្ការការខាតបង់ និងការរីករាលដាលជំងឺនៅក្នុងចម្ការ។
១. ដង្កូវចោះផ្លែ និងដង្កូវកាត់ស្លឹក
ដង្កូវចោះផ្លែ និងដង្កូវកាត់ស្លឹក ជាសត្វល្អិតចង្រៃមួយប្រភេទដែលបំផ្លាញផ្លែ និងស្លឹកប៉េងប៉ោះ ធ្វើឱ្យទិន្នផល និងគុណភាពផ្លែថយចុះ។
វិធីការពារ និងកម្ចាត់
- បេះកូនដង្កូវ និងពងដង្កូវដោយដៃនៅដំណាក់កាលដំបូង
- ប្រើប្លាស្ទិចគ្របរង ដើម្បីកាត់បន្ថយពពួកដង្កូវក្នុងដី
- ប្រើថ្នាំពុល (ប្រឹក្សាជាមួយអ្នកជំនាញកសិកម្មដើម្បីប្រើប្រាស់បានត្រឹមត្រូវ)
២. ដង្កូវស៊ីញ៉េ ឬដង្កូវផែនទី
ដង្កូវស៊ីញ៉េ បំផ្លាញស្លឹក និងដើមប៉េងប៉ោះ ដោយមេរុយស៊ីញ៉េពេញវ័យទម្លាក់ពងលើស្លឹក។
វិធីការពារ និងកម្ចាត់
- ប្រើអន្ទាក់ពណ៌លឿង ដើម្បីចាប់មេរុយស៊ីញ៉េពេញវ័យ
- កាត់ស្លឹក និងដើមដែលត្រូវបានបំផ្លាញ យកទៅដុត ឬកប់ចោល
- បំផ្លាញកាកសំណល់បន្លែផ្សេងៗនៅក្នុងចម្ការ ដើម្បីកាត់បន្ថយប្រភពបង្កើតដង្កូវ
- ប្រើថ្នាំពុលកសិកម្ម ដោយប្រឹក្សាជាមួយអ្នកជំនាញកសិកម្ម ឬមន្ត្រីកសិកម្មឃុំ
ការបាញ់ថ្នាំ
- មិនត្រូវលាយថ្នាំពុលកសិកម្មច្រើនមុខក្នុងពេលតែមួយ
- ជ្រើសរើសក្បាលបាញ់ដែលបង្កើតជាផ្សែងសាចល្អ ដើម្បីឲ្យថ្នាំជាប់ល្អលើស្លឹក
- លាយទឹកស្អិតជាមួយថ្នាំមុនបាញ់
- បាញ់ថ្នាំឲ្យសព្វទាំងខាងលើ និងខាងក្រោមស្លឹក
- គួរបាញ់នៅពេលល្ងាច ដើម្បីបង្កើនប្រសិទ្ធភាព និងកាត់បន្ថយការប៉ះពាល់បរិស្ថាន
៣. រុយស
រុយស ជាសត្វល្អិតជញ្ជក់ដែលបង្កឱ្យដំណាំខ្សោយ និងជាភ្នាក់ងារនាំជំងឺវីរុស។
វិធីការពារ និងកម្ចាត់
- ប្រើអន្ទាក់ស្និតពណ៌លឿង
- ដកស្មៅចង្រៃចេញពីចម្ការ ព្រោះវាជាជំរកសត្វល្អិត
- ប្រើថ្នាំ Dinotefuran ចំនួន ២ ក្រាមក្នុងមួយរណ្តៅ ដាក់មុន ឬក្រោយដាំ (មិនលើស ៧ ថ្ងៃបន្ទាប់ពីដាំ)
- បាញ់ថ្នាំកម្ចាត់សត្វល្អិត តាមការណែនាំរបស់អ្នកជំនាញកសិកម្ម
របៀបធ្វើអន្ទាក់ចាប់រុយស
- ប្រើកាវស្និតចាប់សត្វល្អិត
- លាបកាវលើអន្ទាក់ប្លាស្ទិចពណ៌លឿង
- ដាក់អន្ទាក់ចន្លោះពីគ្នា ៧–១០ ម៉ែត្រ
៤. ជំងឺស្លឹកប៉េងប៉ោះរួញពណ៌លឿង
ជំងឺវីរុសនេះ បណ្តាលឱ្យស្លឹករួញ មានពណ៌លឿង និងប៉ះពាល់យ៉ាងខ្លាំងដល់ទិន្នផល។
វិធីការពារ និងកម្ចាត់
- ប្រើពូជដែលមានភាពធន់នឹងជំងឺ
- ប្រើអន្ទាក់ពណ៌លឿង និងប្លាស្ទិចគ្របដី ដើម្បីកាត់បន្ថយចំនួនរុយស
- ប្រើ Dinotefuran ២ ក្រាមក្នុងមួយរណ្តៅ ដាក់មុន ឬក្រោយដាំ (មិនលើស ៧ ថ្ងៃ)
- បាញ់ថ្នាំកម្ចាត់សត្វល្អិតជញ្ជក់ តាមការណែនាំរបស់អ្នកជំនាញ
៥. ជំងឺស្រពោនស្លឹក
ជំងឺស្រពោនស្លឹក បង្កឱ្យដើមប៉េងប៉ោះស្រពោន និងងាប់ ប្រសិនបើមិនគ្រប់គ្រងទាន់ពេលវេលា។
វិធីការពារ និងកម្ចាត់
- ប្រើពូជធន់នឹងជំងឺ
- ដាំឆ្លាស់មុខដំណាំ
- ការពារកុំឲ្យឫស និងផ្នែកផ្សេងៗនៃដើមរងរបួស ដែលអាចអនុញ្ញាតឱ្យបាក់តេរីជ្រៀតចូល
- ពិនិត្យចម្ការជាប្រចាំ ហើយដកដើមដែលមានរោគសញ្ញាស្រពោនចេញភ្លាមៗ
- មិនត្រូវបង្ហូរទឹកពីរងដែលមានជំងឺ ទៅរងផ្សេងទៀតឡើយ
៦. ជំងឺរលួយផ្លែ
ជំងឺរលួយផ្លែ ប៉ះពាល់ដល់គុណភាពផ្លែប៉េងប៉ោះ និងបណ្តាលឱ្យខាតបង់ទិន្នផល។
វិធីការពារ និងកម្ចាត់
- រើសយកផ្លែដែលមានជំងឺចេញពីចំការ
- ស្រោចជី បំប៉ន
- ជៀសវាងការប្រើជីអាសូតច្រើនពេក ព្រោះធ្វើឱ្យដីមានជាតិអាស៊ីតខ្ពស់ និងខ្វះជាតិកាល់ស្យូម បណ្តាលឱ្យផ្លែរលួយតាំងពីវ័យក្មេង៕
ដោយ៖ សែន តុលា
ប្រភព៖ ឯកសារក្រសួងកសិកម្ម / Aggie Horticulture