បងប្អូនកសិករខ្លះប្រហែលជាធ្លាប់ឃើញស្លឹកដំណាំឡើងស្នាមអុចៗពណ៌ប្រាក់ ឬស្លឹកឡើងរួញក្រញុលខុសធម្មតា។ នោះគឺជាសញ្ញានៃការយាយីពីសត្វល្អិតទ្រីប (Thrips) ដែលជាសត្រូវតូចល្អិតបំផុត ប៉ុន្តែមានឥទ្ធិពលបំផ្លាញយ៉ាងសាហាវលើដំណាំបន្លែ និងម្ទេស។
១. ការបំផ្លាញរបស់ទ្រីប
ទ្រីបគឺជាសត្វល្អិតដែលមានទំហំតូចខ្លាំង (ប៉ុនចុងម្ជុល) ដែលចូលចិត្តជញ្ជក់រុក្ខរសពីស្លឹក ផ្កា និងផ្លែរបស់ដំណាំ។
- សញ្ញាលើស្លឹក៖ ស្លឹកមានស្នាមឆ្នូតពណ៌ប្រាក់ ឬពណ៌ប្រផេះ និងមានចំណុចខ្មៅតូចៗ (លាមករបស់វា)។
- សញ្ញាលើផ្លែ និងផ្កា៖ ធ្វើឱ្យផ្កាឡើងក្រៀម ជ្រុះ និងធ្វើឱ្យផ្លែមានសណ្ឋានក្រវិចក្រវៀនឬក្រិន។
- គ្រោះថ្នាក់បំផុត៖ ទ្រីបគឺជាភ្នាក់ងារចម្លងមេរោគវីរុសពីដើមមួយទៅដើមមួយទៀត ដែលអាចធ្វើឱ្យដំណាំបងប្អូនបាត់បង់ទិន្នផលទាំងស្រុង។
២. យុទ្ធសាស្ត្រការពារ និងកម្ចាត់តាមបែបចម្រុះ
យោងតាមអ្នកជំនាញកសិកម្ម និងស្ថាប័ន UC យុទ្ធសាស្ត្រការពារ និងកម្ចាត់តាមបែបចម្រុះ(IPM) បងប្អូនមិនគួររំពឹងតែលើថ្នាំគីមីមួយមុខនោះទេ ប៉ុន្តែត្រូវប្រើវិធីសាស្ត្រចម្រុះគ្នា។
ការប្រើប្រាស់វិធីសាស្រ្តរូបវន្ត
- អន្ទាក់ស្អិតពណ៌ខៀវ (Blue Sticky Traps)៖ ខុសពីសត្វល្អិតដទៃដែលចូលចិត្តពណ៌លឿង សត្វទ្រីបមានចំណូលចិត្តខ្លាំងលើពណ៌ខៀវ។ ការដាក់អន្ទាក់ពណ៌ខៀវជួយឱ្យបងប្អូនដឹងពីចំនួនទ្រីបក្នុងចម្ការ និងកម្ចាត់មេអំបៅរបស់វាបានយ៉ាងច្រើន។
- ការប្រើកម្រាលចំណាំង (Reflective Mulch)៖ ការប្រើប្លាស្ទិកគ្របរងពណ៌ប្រាក់ ជួយជះពន្លឺថ្ងៃត្រឡប់ទៅវិញ ដែលធ្វើឱ្យសត្វទ្រីបភាន់ភ្នែក និងមិនហ៊ានចុះមកទុំលើដំណាំ។
ការការពារតាមបែបជីវសាស្ត្រ
នេះគឺជាវិធីសាស្ត្រប្រើសត្រូវធម្មជាតិ កម្ចាត់សត្រូវលើដំណាំ។
- សត្វល្អិតស្លាបសំណាញ់ (Green Lacewings)៖ ដូចដែលយើងបានដឹង ពួកវាគឺជាអ្នកប្រមាញ់ដ៏ពូកែដែលស៊ីសត្វទ្រីបជាអាហារ។
- ការដាំផ្កាស្បៃរឿង៖ ការដាំផ្កាស្បៃរឿងជុំវិញចម្ការ ជួយទាក់ទាញសត្វទ្រីបឱ្យទៅស៊ីផ្កាស្បៃរឿងជំនួសវិញ និងជាជម្រកសម្រាប់សត្វល្អិតមានប្រយោជន៍។
វិធានការគីមី និងសរីរាង្គ
ក្នុងករណីមានការរាតត្បាតខ្លាំងយើងត្រូវប្រថ្នាំជំនួយទើបបាន។
- ថ្នាំសរីរាង្គ៖ ប្រើប្រាស់ ប្រេងស្តៅឬ សាប៊ូ ដើម្បីកម្ចាត់ស្រទាប់ការពារខ្លួនរបស់វា។
- ថ្នាំគីមី៖ សារធាតុសកម្ម Spinosad ត្រូវបានចាត់ទុកថាមានប្រសិទ្ធភាពខ្ពស់បំផុតសម្រាប់ទ្រីប។ ប៉ុន្តែត្រូវប្រុងប្រយ័ត្ន កុំបាញ់នៅពេលឃ្មុំកំពុងក្រវែលផ្កា។
រុក្ខជាតិដែលមានសុខភាពល្អ គឺធន់នឹងការជញ្ជក់របស់ទ្រីបបានប្រសើរ។ ការបង្កើន សារធាតុសរីរាង្គក្នុងដី (Soil Organic Matter) ជួយឱ្យរុក្ខជាតិមានប្រព័ន្ធការពារខ្លួនមាំមួន។ ដីដែលមានសំណើមគ្រប់គ្រាន់ និងមិនសូវមានជាតិអាសូតលើសលប់ នឹងធ្វើឱ្យរុក្ខជាតិមិនសូវទាក់ទាញសត្វទ្រីបមកស៊ីឡើយ។
បច្ចេកទេសសង្កេតដំណាំ
- ឧស្សាហ៍ពិនិត្យក្រោមស្លឹក៖ ប្រើកញ្ចក់ពង្រីកដើម្បីពិនិត្យបើអាច ព្រោះទ្រីបតូចណាស់។
- ស្រោចទឹកតាមស្លឹក៖ ការស្រោចទឹកបែបបាញ់ ជួយលាងជម្រះសត្វទ្រីបចេញពីស្លឹកបានខ្លះ។
- ជម្រះស្មៅ៖ ស្មៅជុំវិញចម្ការគឺជាជម្រកសម្ងំរបស់ទ្រីប ដូច្នេះត្រូវធ្វើចម្ការឱ្យស្អាតជានិច្ច។
ដោយ៖ ចាន់ តារា
ប្រភព៖ Cropaia / ឯកសារក្រសួងកសិកម្ម