ការចាប់ផ្ដើមចិញ្ចឹមមាន់មិនមែនមានត្រឹមតែពូជមាន់ វ៉ាក់សាំងនិងទ្រុងនោះទេ ប៉ុន្តែវាទាមទារនូវការត្រៀមលក្ខណៈលើសម្ភារៈបច្ចេកទេសមួយចំនួន ដើម្បីធានាថាមាន់របស់បងប្អូនលូតលាស់បានល្អ និងមានអត្រាងាប់ទាប។ សម្រាប់អ្នកចាប់ផ្ដើមចិញ្ចឹមមាន់ដំបូងៗគួរដឹងគន្លឹះទាំងប្រាំមួយនេះជាមុន។
១. វីតាមីន និងអេឡិចត្រូលីត
វីតាមីន និងអេឡិចត្រូលីត គឺជាថាមពលជំនួយដ៏សំខាន់ ជាពិសេសនៅពេលកូនមាន់ទើបដឹកមកដល់កសិដ្ឋាន ឬនៅពេលអាកាសធាតុក្ដៅខ្លាំង។
- អត្ថប្រយោជន៍៖ ជួយកាត់បន្ថយភាពតានតឹងពង្រឹងប្រព័ន្ធការពាររាងកាយ និងជួយឱ្យមាន់ឆាប់ចេះស៊ីចំណី។
- ការអនុវត្ត៖ គួរលាយទឹកឱ្យមាន់ផឹកឱ្យបានទៀងទាត់ក្នុងរយៈពេល ៣-៥ ថ្ងៃដំបូង។
២. ការគ្រប់គ្រងប៉ារ៉ាស៊ីតក្រៅ
សត្វល្អិតដូចជា ចៃ ចៃមាន់ ស្រមើល ឬមេរោគផ្សិតលើជើង អាចធ្វើឱ្យមាន់ខ្សោយ និងអាក់ពង។
- ការព្យាបាល៖ ប្រសិនបើឃើញជើងមាន់មានស្រកាក្រាស់ៗ ឬដុះផ្សិត ត្រូវប្រើថ្នាំលាប ឬថ្នាំបាញ់សម្រាប់ព្យាបាលជើងជាបន្ទាន់។ ប្រឹក្សាជាមួយអ្នកជំនាញអំពីការប្រើប្រាស់ថ្នាំបានត្រឹមត្រូវ។
- ការបាញ់សម្លាប់មេរោគក្នុងទ្រុង៖ មេរោគច្រើនតែលាក់ខ្លួនតាមប្រហោងឈើ ឬនៅកែងៗទ្រុង។ ការបាញ់ថ្នាំសម្លាប់សត្វល្អិតក្នុងទ្រុង ជួយការពារមាន់ពីការរំខាននៅពេលយប់។
៣. ម្សៅកម្ចាត់សត្វល្អិត
នេះគឺជាម្សៅធម្មជាតិដែលមានប្រសិទ្ធភាពខ្ពស់ក្នុងការកម្ចាត់ចៃ និងសត្វល្អិតក្នុងទ្រុង។
- វិធីប្រើ៖ បាចវានៅកន្លែងដែលឱ្យមាន់ដេក ឬកន្លែងដែលវាលេង។
- ប្រុងប្រយ័ត្ន៖ ត្រូវប្រើប្រភេទ “Food-Grade” (សុវត្ថិភាពសម្រាប់សត្វស៊ី) និងប្រយ័ត្នកុំឱ្យហុយចូលភ្នែក ឬច្រមុះមាន់ខ្លាំងពេក។
៤. កញ្ចប់សង្គ្រោះបឋម
កសិដ្ឋាននីមួយៗគួរមានប្រអប់ថ្នាំសង្គ្រោះបន្ទាន់ ដែលរួមមាន៖ ថ្នាំលាបដំបៅ ស្រោមដៃ កន្សែងស្អាត និងឧបករណ៍រុំរបួស។ គោលបំណងសំខាន់គឺ សម្រាប់ប្រើប្រាស់ភ្លាមៗនៅពេលមាន់ចឹកគ្នា មានរបួស ឬត្រូវសត្វផ្សេងខាំ ដើម្បីបង្ការការឆ្លងមេរោគ និងការហូរឈាម។
៥. អនាម័យស្នូកទឹក និងស្នូកចំណី
មេរោគភាគច្រើនឆ្លងតាមរយៈការស៊ី និងការផឹក។ ជាការណែនាំ កសិករត្រូវលាងសម្អាតស្នូកទឹក និងស្នូកចំណីឱ្យបានរាល់ថ្ងៃ។ ស្នូកដែលស្អាតជួយបង្ការជំងឺរាក និងជំងឺផ្លូវដង្ហើមបានយ៉ាងមានប្រសិទ្ធភាព។
អគ្គនាយកដ្ឋានសុខភាពសត្វបញ្ជាក់ថាជីវសុវត្ថិភាព(Biosecurity) ចាប់ផ្ដើមពីអនាម័យស្នូកទឹក ចំណី និងការគ្រប់គ្រងប៉ារ៉ាស៊ីត។ ការប្រើប្រាស់វីតាមីនបានត្រឹមត្រូវ អាចកាត់បន្ថយអត្រាងាប់របស់កូនមាន់បានរហូតដល់ ៣០%។
ចំណែកអង្គការ FAO ក៏បានណែនាំឱ្យកសិករខ្នាតតូចយកចិត្តទុកដាក់លើការគ្រប់គ្រងចៃមាន់ ព្រោះវាជាភ្នាក់ងារចម្លងជំងឺដ៏សកម្ម និងធ្វើឱ្យមាន់ចុះខ្សោយកម្លាំងខ្លាំង។ កុំរង់ចាំដល់មាន់ឈឺទើបដើររកទិញថ្នាំ។ ការមានសម្ភារៈទាំងនេះនៅក្នុងដៃ គឺជាការធានារ៉ាប់រងដ៏ល្អបំផុតសម្រាប់អាជីវកម្មចិញ្ចឹមមាន់របស់បងប្អូន។
ដោយ៖ ចាន់ តារា
ប្រភព៖ FAO / Poultry India