ដើមទៀបបារាំង មិនត្រឹមតែផ្តល់នូវផ្លែដែលមានរសជាតិឆ្ងាញ់ និងមានប្រយោជន៍សម្រាប់មនុស្សប៉ុណ្ណោះទេ ប៉ុន្តែស្លឹករបស់វាក៏ត្រូវបានកសិករជាច្រើនប្រើប្រាស់ជាឱសថបុរាណដ៏មានប្រសិទ្ធភាពក្នុងការថែរក្សាសុខភាពសត្វចិញ្ចឹម ជាពិសេសគឺមាន់ផងដែរ។ ការប្រើប្រាស់ស្លឹកទៀបបារាំងក្នុងការចិញ្ចឹមមាន់ គឺជាវិធីសាស្ត្រធម្មជាតិដែលចំណាយតិច តែផ្តល់អត្ថប្រយោជន៍ខ្ពស់។
ខាងក្រោមនេះគឺជាអត្ថប្រយោជន៍ និងរបៀបប្រើប្រាស់ស្លឹកទៀបបារាំងដើម្បីជួយដល់សុខភាពមាន់របស់បងប្អូន។
អត្ថប្រយោជន៍សំខាន់ៗនៃស្លឹកទៀបបារាំងសម្រាប់មាន់
- ពង្រឹងប្រព័ន្ធភាពស៊ាំ៖ ស្លឹកទៀបបារាំងសម្បូរទៅដោយវីតាមីន C និងសារធាតុប្រឆាំងអុកស៊ីតកម្ម ដែលជួយពង្រឹងប្រព័ន្ធការពាររាងកាយរបស់មាន់ ធ្វើឲ្យពួកវាមានភាពធន់នឹងជំងឺឆ្លងផ្សេងៗតាមរដូវកាល។
- ព្យាបាលបញ្ហាផ្លូវរំលាយអាហារ និងរាករូស៖ សារធាតុសកម្មនៅក្នុងស្លឹកទៀបបារាំងមានលក្ខណៈសម្បត្តិប្រឆាំងនឹងបាក់តេរី ដែលអាចជួយព្យាបាលជំងឺរាករូស ជំងឺរលាកពោះវៀន និងជួយឲ្យប្រព័ន្ធរំលាយអាហាររបស់មាន់ដំណើរការបានល្អ។
- កម្ចាត់ប៉ារ៉ាស៊ីត និងសត្វល្អិតចង្រៃ៖ ស្លឹកទៀបបារាំងមានប្រសិទ្ធភាពក្នុងការសម្លាប់ និងបណ្តេញប៉ារ៉ាស៊ីតទាំងខាងក្នុង (ដូចជាព្រូន) និងខាងក្រៅ (ដូចជាចៃ សង្កើច) ដែលរំខានដល់ការលូតលាស់របស់មាន់។
- កាត់បន្ថយភាពតានតឹង៖ ទឹកស្ងោរស្លឹកទៀបបារាំងជួយឲ្យមាន់មានអារម្មណ៍ស្ងប់ កាត់បន្ថយភាពតានតឹងនៅពេលអាកាសធាតុក្តៅខ្លាំង ឬនៅពេលមានការផ្លាស់ប្តូរទីកន្លែង។
របៀបប្រើប្រាស់ស្លឹកទៀបបារាំង
១. ការធ្វើជាទឹកសម្រាប់ឲ្យមាន់ផឹក
កសិករយើងអាចយកស្លឹកទៀបបារាំងចាស់ៗ (មិនខ្ចីពេក ឬចាស់ពេក) ប្រមាណ ១០ ទៅ ១៥ សន្លឹក លាងទឹកឲ្យស្អាត។
- ដាំទឹកប្រមាណ ២ ទៅ ៣ លីត្រឲ្យពុះ រួចដាក់ស្លឹកទៀបបារាំងចូល ហើយរំងាស់រយៈពេល ១៥ ទៅ ២០ នាទី។
- ទុកទឹកនោះឲ្យត្រជាក់ រួចត្រងយកតែទឹក មកលាយជាមួយទឹកធម្មតាឲ្យមាន់ផឹកជាប្រចាំ ឬយ៉ាងហោចណាស់ ២ ទៅ ៣ ដង ក្នុងមួយសប្តាហ៍។
២. ការលាយជាមួយចំណី
- យកស្លឹកទៀបបារាំងស្រស់មកហាន់ឲ្យល្អិតៗ ឬបុកឲ្យម៉ដ្ឋ។
- យកទៅលាយជាមួយចំណីប្រចាំថ្ងៃរបស់មាន់ (ដូចជា កន្ទក់ ចុងអង្ករ ឬចំណីសម្រេច)។ វិធីនេះជួយបង្កើនចំណង់អាហារ និងសម្រួលដល់ការរំលាយអាហារ។
៣. ការប្រើប្រាស់សម្រាប់ខាងក្រៅ
- បុកស្លឹកទៀបបារាំងឲ្យម៉ដ្ឋ រួចយកទៅលាប ឬត្រដុសលើរោមមាន់ដែលសម្បូរចៃ។
- បងប្អូនក៏អាចយកស្លឹកទៀបបារាំងស្រស់ ទៅទ្រាប់បាតសំបុកមាន់ក្រាប ដើម្បីបណ្តេញសត្វល្អិតចង្រៃមិនឲ្យមករំខានមេមាន់កូន និងពងរបស់វាបានផងដែរ។ ប៉ុន្តែវិធីនេះមិនអាចជំនួយទាំងស្រុងលើការប្រើប្រាស់ថ្នាំបាញ់សម្លាប់សត្វល្អិតចង្រៃនៅក្នុងទ្រុងមាន់បងប្អូនបាននោះទេ។
ចំណុចគួរប្រុងប្រយ័ត្ន
- កម្រិតនៃការប្រើប្រាស់៖ មិនគួរឲ្យមាន់ផឹកទឹកស្លឹកទៀបបារាំងខាប់ពេក ឬច្រើនលើសលុបពេកនោះទេ ព្រោះវាអាចបណ្តាលឲ្យមានផលប៉ះពាល់ដល់សុខភាពទៅវិញ។ គួរចាប់ផ្តើមពីកម្រិតល្មមសិន។
- អនាម័យ៖ ត្រូវប្រាកដថាស្លឹកដែលយកមកប្រើប្រាស់ គឺស្អាត និងគ្មានជាប់ថ្នាំពុលគីមីកសិកម្មផ្សេងៗ។
- ការប្រើប្រាស់រួមផ្សំ៖ ទោះបីជាស្លឹកទៀបបារាំងពូកែយ៉ាងណាក៏ដោយ វាមិនអាចជំនួសវ៉ាក់សាំងការពារជំងឺធ្ងន់ធ្ងរ (ដូចជាជំងឺសារទឹក) បានទាំងស្រុងនោះទេ។ ការចាក់វ៉ាក់សាំងតាមកាលវិភាគនៅតែជារឿងចាំបាច់។
ការប្រើប្រាស់ស្លឹកទៀបបារាំង ជាជម្រើសដ៏ឆ្លាតវៃមួយសម្រាប់អ្នកចិញ្ចឹមមាន់តាមបែបធម្មជាតិ។ វាជួយកាត់បន្ថយការចំណាយលើការទិញថ្នាំគីមី ធានាបាននូវសុវត្ថិភាពទាំងសត្វចិញ្ចឹម និងអ្នកបរិភោគ ព្រមទាំងចូលរួមចំណែកក្នុងការថែរក្សាបរិស្ថានបានយ៉ាងល្អប្រសើរ។ បើបងប្អូនធ្លាប់ប្រើប្រាស់វិធីនេះជួយចែករំលែកបទពិសោធផង៕
ដោយ៖ សែន តុលា
ប្រភព៖ Poultry Tips /Journal of World’s Poultry Science