ស្មៅចង្រៃគឺជាសត្រូវដ៏ធំមួយរបស់កសិករ។ ពួកវាដណ្តើមយកសារធាតុចិញ្ចឹម ទឹក និងពន្លឺព្រះអាទិត្យពីដំណាំ ដែលធ្វើឱ្យដំណាំចុះខ្សោយ និងកាត់បន្ថយទិន្នផលយ៉ាងច្រើន។ ដើម្បីទទួលបានផលជោគជ័យក្នុងការដាំដុះ ការយល់ដឹងអំពីបច្ចេកទេសគ្រប់គ្រងស្មៅចង្រៃឱ្យមានប្រសិទ្ធភាពគឺជារឿងចាំបាច់បំផុត។
១. វិធីសាស្ត្របង្ការ
ការបង្ការគឺជាជំហានដំបូង និងមានប្រសិទ្ធភាពបំផុត។ វាមានបំណងទប់ស្កាត់កុំឱ្យគ្រាប់ស្មៅរីករាលដាលចូលក្នុងចម្ការ៖
- ប្រើប្រាស់គ្រាប់ពូជដំណាំដែលស្អាត និងគ្មានលាយឡំគ្រាប់ស្មៅ។
- សម្អាតឧបករណ៍កសិកម្ម និងគ្រឿងចក្រឱ្យបានស្អាតមុននឹងយកទៅប្រើប្រាស់ក្នុងចម្ការផ្សេង។
- ប្រើប្រាស់ជីធម្មជាតិ ឬជីកំប៉ុស្តដែលបានរលួយសព្វល្អ ដើម្បីធានាថាគ្រាប់ស្មៅដែលមានក្នុងជីនោះត្រូវបានកំចាត់អស់។
២. វិធីសាស្ត្រតាមបែបដាំដុះ
បច្ចេកទេសនេះប្រើប្រាស់ការរៀបចំប្រព័ន្ធដាំដុះដើម្បីកាត់បន្ថយការដុះស្មៅ៖
- ការផ្លាស់ប្តូរមុខដំណាំ៖ ការដាំដំណាំខុសៗគ្នាឆ្លាស់គ្នានៅលើដីតែមួយ ជួយកាត់ផ្តាច់វដ្តជីវិតរបស់ស្មៅប្រភេទណាមួយ។
- ការដាំដំណាំចម្រុះ៖ ការដាំដំណាំច្រើនមុខក្នុងពេលតែមួយ ដើម្បីឱ្យស្លឹកដំណាំគ្របដណ្តប់ដីបានលឿន កាត់បន្ថយពន្លឺដែលស្មៅត្រូវការដើម្បីដុះ។
- ដង់ស៊ីតេដាំដុះ៖ ការដាំដំណាំក្នុងចម្ងាយសមស្របដែលជួយឱ្យស្លឹកដំណាំបិទជិតបានលឿន នឹងជួយសង្កត់ស្មៅកុំឱ្យដុះ។
៣. វិធីសាស្ត្រមេកានិច ឬរូបវន្ត
វិធីសាស្ត្រនេះតម្រូវឱ្យប្រើប្រាស់កម្លាំងពលកម្ម ឬឧបករណ៍៖
- ការដកដោយដៃ និងការជ្រុំជ្រៅ៖ ជាវិធីសាមញ្ញបំផុតសម្រាប់ផ្ទៃដីតូច។
- ការភ្ជួររាស់៖ ការរៀបចំដីឱ្យបានល្អមុនដាំដុះ ជួយកម្ទេចស្មៅដែលដុះស្រាប់ និងកប់គ្រាប់ស្មៅទៅក្នុងដីជ្រៅ។
- ការគ្របដី៖ ការប្រើចំបើង ស្លឹកឈើស្ងួត ឬកៅស៊ូគ្របដី ដើម្បីបិទបាំងពន្លឺព្រះអាទិត្យ មិនឱ្យស្មៅដុះមកលើបាន។
៤. វិធីសាស្ត្រគីមី
ការប្រើប្រាស់ថ្នាំសម្លាប់ស្មៅគឺជាវិធីដែលឆាប់រហ័ស ប៉ុន្តែត្រូវប្រើប្រាស់ដោយការប្រុងប្រយ័ត្ន៖
- ថ្នាំបាញ់មុនដំណាំដុះ៖ បាញ់លើដីដើម្បីទប់ស្កាត់ការដុះចេញពីគ្រាប់ស្មៅ។
- ថ្នាំបាញ់ក្រោយដំណាំដុះ៖ បាញ់សម្លាប់ស្មៅដែលកំពុងលូតលាស់។
- ចំណាំ៖ ត្រូវជ្រើសរើសប្រភេទថ្នាំឱ្យត្រូវនឹងប្រភេទស្មៅ និងអនុវត្តតាមការណែនាំលើស្លាកសញ្ញាឱ្យបានខ្ជាប់ខ្ជួន ដើម្បីជៀសវាងផលប៉ះពាល់ដល់សុខភាព និងបរិស្ថាន ឬប្រឹក្សាជាមួយមន្ត្រីកសិកម្មឃុំទើបជាការប្រសើរ។
៥. វិធីសាស្ត្រជីវសាស្ត្រ
វិធីនេះប្រើប្រាស់សត្រូវធម្មជាតិដើម្បីគ្រប់គ្រងស្មៅ ដូចជាការប្រើប្រាស់សត្វល្អិត សត្វចិញ្ចឹម (ទា ឬត្រីក្នុងស្រែ) ឬមេរោគផ្សិតមួយចំនួនដែលបំផ្លាញតែស្មៅចង្រៃ ប៉ុន្តែមិនប៉ះពាល់ដល់ដំណាំ។
៦. ការគ្រប់គ្រងស្មៅតាមបែបចម្រុះ
នេះគឺជាវិធីសាស្ត្រដែលល្អបំផុត ដោយកសិករមិនត្រូវពឹងផ្អែកលើវិធីណាមួយតែមួយមុខនោះទេ។ ការបញ្ចូលគ្នាពហុវិធីសាស្ត្រ (ឧទាហរណ៍៖ ភ្ជួរដីឱ្យល្អ រួមផ្សំ ដាំដំណាំឆ្លាស់ ឬ ជ្រុំស្មៅដោយដៃ) នឹងជួយឱ្យការគ្រប់គ្រងស្មៅមានប្រសិទ្ធភាពខ្ពស់បំផុត កាត់បន្ថយចំណាយ និងបង្កើនទិន្នផលប្រកបដោយនិរន្តរភាព។
ការគ្រប់គ្រងស្មៅចង្រៃមិនមែនត្រឹមតែជាការសម្លាប់ស្មៅប៉ុណ្ណោះទេ ប៉ុន្តែគឺជាការបង្កើតបរិយាកាសមួយដែលផ្តល់អត្ថប្រយោជន៍ដល់ដំណាំ និងកាត់បន្ថយឱកាសលូតលាស់របស់ស្មៅ។ ការធ្វើបែបនេះនឹងធានាបានថា ដំណាំរបស់អ្នកទទួលបានជីវជាតិគ្រប់គ្រាន់ដើម្បីផ្តល់ផលបានច្រើន៕
ដោយ៖ សែន តុលា
ប្រភព៖ Agritiec International / FAO