រដូវវស្សា ឬធ្លាក់ភ្លៀងខ្លាំង គឺជារដូវដែលពោរពេញទៅដោយបញ្ហាប្រឈមជាច្រើនសម្រាប់បងប្អូនកសិករអ្នកចិញ្ចឹមមាន់។ ការធ្លាក់ចុះនៃសីតុណ្ហភាព ការកើនឡើងនូវសំណើម និងខ្យល់ត្រជាក់ អាចធ្វើឲ្យមាន់ងាយទទួលរងនូវភាពតានតឹង និងប្រឈមមុខខ្ពស់នឹងការឆ្លងជំងឺផ្សេងៗ ដែលអាចបណ្តាលឲ្យអត្រាងាប់មានការកើនឡើង។
ដើម្បីធានាបាននូវសុខភាពល្អ និងកាត់បន្ថយអត្រាងាប់របស់មាន់ក្នុងរដូវភ្លៀងធ្លាក់ ខាងក្រោមនេះគឺជាវិធានការសំខាន់ៗដែលអ្នកគួរអនុវត្ត។
១. ការរៀបចំ និងជួសជុលទ្រុងមាន់
បរិយាកាសក្នុងទ្រុងគឺជាកត្តាទីមួយក្នុងការការពារមាន់ពីអាកាសធាតុអាក្រក់។
- ជួសជុលដំបូល៖ ត្រូវប្រាកដថាដំបូលទ្រុងមិនមានការលេចធ្លាយ ដែលអាចធ្វើឲ្យទឹកភ្លៀងស្រក់ចូលក្នុងទ្រុងបាន។
- បាំងខ្យល់៖ ប្រើប្រាស់តង់ ឬប្លាស្ទិកដើម្បីបាំងជុំវិញទ្រុង ការពារកុំឲ្យខ្យល់ត្រជាក់ ឬទឹកភ្លៀងសាចចូល។ ប៉ុន្តែ ត្រូវទុកចន្លោះខ្លះដើម្បីឲ្យមានខ្យល់ចេញចូលបានល្អ ការពារការថប់ដង្ហើម។
- ប្រព័ន្ធរំដោះទឹក៖ ត្រូវធ្វើប្រព័ន្ធប្រឡាយបង្ហូរទឹកជុំវិញទ្រុង ដើម្បីកុំឲ្យមានទឹកដក់ ដែលជាប្រភពនៃការកកើតមេរោគ និងសត្វល្អិតចង្រៃ។
២. ការគ្រប់គ្រងកម្រាល ឬបាតទ្រុង
កម្រាលទ្រុងដែលសើមគឺជាមូលហេតុចម្បងនៃការកកើតមេរោគ និងឧស្ម័នពុល។
- រក្សាភាពស្ងួត៖ ត្រូវរក្សាកម្រាលទ្រុងឲ្យស្ងួតជានិច្ច។ សំណើមខ្ពស់ធ្វើឲ្យកម្រាលឆាប់ដុះផ្សិត និងបង្កើតឧស្ម័នអាម៉ូញាក់ ដែលធ្វើឲ្យមាន់ឈឺភ្នែក និងរលាកផ្លូវដង្ហើម។
- ផ្លាស់ប្តូរកម្រាលសើម៖ ប្រសិនបើឃើញកម្រាលមានសភាពសើម ឬកកដុំៗ ត្រូវកាយចេញ និងចាក់កម្រាលថ្មី (អង្កាម ឬកម្ទេចឈើស្ងួត) ជំនួសវិញភ្លាមៗ ដើម្បីការពារជំងឺ។
៣. ការផ្តល់កម្តៅ និងពន្លឺ
មាន់ត្រូវការសីតុណ្ហភាពកក់ក្តៅ ដើម្បីរក្សាសីតុណ្ហភាពរាងកាយ ជាពិសេសកូនមាន់។
- បន្ថែមឧបករណ៍ផ្តល់កម្តៅ៖ ប្រើប្រាស់អំពូលភ្លើង ឬចង្ក្រានកម្តៅ (ត្រូវប្រយ័ត្នបញ្ហាអគ្គិភ័យ) ដើម្បីផ្តល់កម្តៅបន្ថែមនៅក្នុងទ្រុង ជាពិសេសនៅពេលយប់ ឬពេលភ្លៀងធ្លាក់ខ្លាំង។
- រក្សាពន្លឺឲ្យបានគ្រប់គ្រាន់៖ ពន្លឺជួយជំរុញឲ្យមាន់នៅតែបន្តស៊ីចំណីទោះបីជាមេឃងងឹត ឬមានភ្លៀងធ្លាក់ក៏ដោយ ដែលនេះជួយឲ្យពួកវាមានកម្លាំង និងកម្តៅក្នុងខ្លួន។
៤. ការគ្រប់គ្រងចំណី និងទឹក
ចំណីអាចងាយនឹងខូចគុណភាពនៅពេលអាកាសធាតុមានសំណើមខ្ពស់។
- ការផ្ទុកចំណី៖ ត្រូវរក្សាទុកចំណីនៅក្នុងកន្លែងដែលស្ងួតល្អ ផុតពីក្ដារ ឬឥដ្ឋ (ដាក់លើរនាប) ដើម្បីការពារកុំឲ្យចំណីស្រូបយកសំណើមដែលបណ្តាលឲ្យដុះផ្សិតពុល។
- ការផ្តល់ចំណីបន្ថែម៖ អាចបន្ថែមបរិមាណចំណីដែលមានថាមពលខ្ពស់ ដើម្បីជួយឲ្យមាន់ផលិតកម្តៅរាងកាយបានគ្រប់គ្រាន់ដើម្បីទប់ទល់នឹងភាពត្រជាក់។
- ទឹកស្អាត និងវីតាមីន៖ ត្រូវប្តូរទឹកជាប្រចាំ និងធានាថាទឹកមានភាពស្អាតជានិច្ច។ ការលាយ វីតាមីន C ឬវីតាមីនចម្រុះក្នុងទឹក គឺជារឿងចាំបាច់បំផុត ដើម្បីជួយកាត់បន្ថយភាពតានតឹង និងពង្រឹងប្រព័ន្ធភាពស៊ាំរបស់មាន់។
៥. ការការពារជំងឺ និងជីវសុវត្ថិភាព
រដូវវស្សាគឺជារដូវដែលមេរោគងាយរីករាលដាលបំផុត។
- ការចាក់វ៉ាក់សាំង៖ ត្រូវធ្វើការចាក់វ៉ាក់សាំងឲ្យបានទៀងទាត់តាមកាលវិភាគ ជាពិសេសជំងឺដែលតែងតែផ្ទុះក្នុងរដូវវស្សា ដូចជា ជំងឺអុតមាន់ (Fowl Pox) ជំងឺអាសន្នរោគ (Fowl Cholera) និងជំងឺញូវកាស (Newcastle Disease)។
- ការថែរក្សាអនាម័យ៖ ដាក់អាងទឹកលាយថ្នាំសម្លាប់មេរោគនៅមុខទ្វារចេញចូលទ្រុង និងកំណត់ចំនួនអ្នកចេញចូលទ្រុងមាន់ ដើម្បីការពារការនាំមេរោគពីខាងក្រៅចូល។
- ថ្នាំទម្លាក់សត្វល្អិត៖ ផ្តល់ថ្នាំទម្លាក់ព្រូន និងការពារជំងឺរាកឈាមតាមការណែនាំរបស់ពេទ្យសត្វ ព្រោះជំងឺទាំងនេះច្រើនកើតឡើងនៅពេលបរិស្ថានសើម។
ការអនុវត្តតាមវិធានការទាំងនេះយ៉ាងខ្ជាប់ខ្ជួន នឹងជួយឲ្យបងប្អូនកសិករអាចឆ្លងកាត់រដូវវស្សាដោយជោគជ័យ ព្រមទាំងរក្សាបាននូវសុខភាពហ្វូងមាន់ និងកាត់បន្ថយការខាតបង់ថវិកាដោយសារអត្រាងាប់បានយ៉ាងមានប្រសិទ្ធភាព៕
ដោយ៖ សែន តុលា
ប្រភព៖ Poultry Trends/ QRLimited