ទីផ្សារទុរេននៅក្នុងប្រទេសវៀតណាមកំពុងជួបប្រទះនូវបញ្ហាប្រឈមយ៉ាងខ្លាំង ខណៈដែលតម្លៃផ្លែឈើនេះបានធ្លាក់ចុះយ៉ាងគំហុក ដោយសារតែឥទ្ធិពលនៃអាកាសធាតុមានភ្លៀងធ្លាក់ជាប់គ្នា ដែលធ្វើឱ្យគុណភាពផ្លែទុរេនធ្លាក់ចុះ និងពិបាកក្នុងការលក់ចេញ។ នេះបើតាមការចុះផ្សាយរបស់សារព័ត៌មាន VN Express កាលពីថ្ងៃទី៦ ខែកក្កដា ឆ្នាំ២០២៦។
យោងតាមរបាយការណ៍សេដ្ឋកិច្ចថ្មីៗនេះ តម្លៃទុរេននៅតាមតំបន់ដាំដុះសំខាន់ៗបានធ្លាក់ចុះជាបន្តបន្ទាប់។ ពាណិជ្ជករនៅក្នុងតំបន់ភាគអាគ្នេយ៍នៃប្រទេសវៀតណាមបានរាយការណ៍ថា ក្នុងអំឡុងពេលដែលរដូវប្រមូលផលកំពុងឈានចូលដល់កម្រិតកំពូល តម្លៃលក់ចេញបានធ្លាក់ចុះគួរឱ្យកត់សម្គាល់។ សម្រាប់ទុរេនដែលមានគុណភាពល្អ ក៏នៅតែមានតម្លៃទាបជាងឆ្នាំមុនៗយ៉ាងច្រើន ដែលជាកម្រិតទាបបំផុតក្នុងរយៈពេលប៉ុន្មានឆ្នាំចុងក្រោយនេះ។ តម្លៃទុរេនពូជ Ri6 លក់បានត្រឹមជាង១ដុល្លារក្នុងមួយគីឡូក្រាម និងទូរេនម៉ានថងវិញលក់បានប្រហែល២ដុល្លារក្នុងមួយគីឡូក្រាម តម្លៃចេញពីចម្ការ។
ការធ្លាក់ចុះនៃថ្លៃទុរេនមិនមែនគ្រាន់តែជាបញ្ហានៃតម្រូវការ និងការផ្គត់ផ្គង់នៅលើទីផ្សារប៉ុណ្ណោះទេ ប៉ុន្តែវាក៏ជាលទ្ធផលនៃកត្តាពីរយ៉ាងសំខាន់ៗ៖
១. បញ្ហាគុណភាព៖ ភ្លៀងធ្លាក់ជាបន្តបន្ទាប់បានជះឥទ្ធិពលអវិជ្ជមានដល់គុណភាពផ្លែទុរេន ដែលធ្វើឱ្យវាមិនអាចឆ្លើយតបទៅនឹងស្តង់ដារគុណភាពខ្ពស់ ដែលទីផ្សារនាំចេញត្រូវការ។
២. ស្តង់ដារនាំចេញ៖ បន្ថែមពីលើបញ្ហាអាកាសធាតុ របបនៃការនាំចេញដែលកាន់តែតឹងរ៉ឹងពីសំណាក់ទីផ្សារប្រទេសនាំចូល បានធ្វើឱ្យកសិករ និងអ្នកជំនួញជួបការលំបាកយ៉ាងខ្លាំងក្នុងការចែកចាយទំនិញ។
បច្ចុប្បន្ន ទុរេនប្រភេទ Grade A និង Grade B មានតម្លៃទាបជាងឆ្នាំមុនៗយ៉ាងខ្លាំង ដែលធ្វើឱ្យកសិករដែលធ្លាប់ទទួលបានប្រាក់ចំណេញខ្ពស់ កំពុងប្រឈមនឹងការខាតបង់ ឬចំណេញតិចតួចបំផុត។ អ្នកជំនាញបានចាត់ទុកថា នេះគឺជាឆ្នាំដ៏លំបាកមួយសម្រាប់ខ្សែសង្វាក់ផលិតកម្មទុរេន ខណៈដែលបញ្ហាតម្លៃមិនមានសញ្ញាណនៃការងើបឡើងវិញក្នុងរយៈពេលខ្លីនេះឡើយ។
វិបត្តិនេះបានបង្កើនការព្រួយបារម្ភក្នុងចំណោមអ្នកដាំដុះទុរេន ដោយពួកគេបានអំពាវនាវឱ្យមានការកែលម្អលើការតភ្ជាប់ទីផ្សារ និងការបង្កើនសមត្ថភាពក្នុងការផលិត ដើម្បីឱ្យស្របតាមស្តង់ដារអន្តរជាតិ ដែលនឹងអាចជួយឱ្យតម្លៃទុរេនមានស្ថិរភាពឡើងវិញនៅពេលអនាគត៕