- Advertisement -
![Advertisement]()
សណ្ដែកសៀងគឺមានតម្រូវការជាប្រចាំសម្រាប់ទីផ្សារកម្ពុជាសម្រាប់បម្រើតម្រូវតាមហាង និង ជាលក្ខណៈគ្រួសារ។
ក. ពូជនៅក្នុងស្រុក
- ពូជសំបកផ្លែពណ៌ស B3039 មានរយៈពេល ៩៨ថ្ងៃ
- ពូជសំបកផ្លែពណ៌ខ្មៅ ពូជក្នុងស្រុកមានរយៈពេល ៩២ថ្ងៃ
- ពូជស្រមូវរយៈពេល ៩៥ថ្ងៃ
- ពូជស្កា រយៈពេល ៩៥ថ្ងៃ
ខ. ពូជក្រៅស្រុក
- ពូជស្រាល (DT84) រយៈពេល ៨១ថ្ងៃ
ពូជនេះជាពូជ ដែលប្រជាកសិករនិយមចូលចិត្តដាំជាងគេ ព្រោះបានផលច្រើន និងមានរយៈពេលខ្លី។
គ. ការរៀបចំដីសសម្រាប់ដាំសណ្ដែកសៀង
- ត្រូវភ្ជួរជំរៅពី ១៥-២៥សម ចំនួន ២ដងរួចហើយរាស់បំបែកដីឲ្យបានបែកល្អិត
- ភ្ជួរលើកទី១ ត្រូវទុកហាលដីពី ៧-១០ថ្ងៃ ហើយរើសយកស្មៅ និងសំរាមផ្សេងៗ ចេញឲ្យបានស្អាត
- សណ្ដែកសៀងត្រូវការដីធូរ មានជីជាតិល្អ មិនបៀម និងមិនជាំទឹក ដែលដំណាំសណ្ដែកសៀងត្រូវការសំណើមដីរហូតដល់ពេលប្រមូលផល។
ឃ. ការដាក់ជីទ្រាប់បាត
- ជីកំប៉ុស្ត (ជីធម្មជាតិ) ត្រូវប្រើពី ១០-២០តោន ក្នុង១ហិកតា
- ជីដេ-អា-ប៉េ ត្រូវប្រើ ១០០គ.ក្រ ក្នុង១ហិកតា
- ជីប៉ូតាស្យូមប្រើ ១០០គ.ក្រ ក្នុង១ហិកតា ជីទាំងអស់នេះត្រូវ ដាក់នៅពេលភ្ជួររាស់មុនដាំ និងត្រូវភ្ជួរច្របល់រាស់ឲ្យសព្វទៅក្នុងដី។
ង. ពេលវេលាដាំដុះ
- ប្រទេសកម្ពុជាយើងសណ្ដែកសៀងត្រូវបានគេកំណត់ការដាំដុះចាប់ពីពាក់កណ្ដាលខែមិថុនា រហូតដល់ចុងខែកក្កដាយ៉ាងយូរបំផុត ព្រោះរយៈពេលក្នុងខែកក្កដានេះ មានសន្សើមចុះពេលយប់ គ្រាប់សណ្ដែកអាចរីកដុះបានក្រោយពេលដាំ និងស្រោចទឹកបន្តិចបន្តួច ហើយរយៈពេល ៤-៥ថ្ងៃ ក្រោយមក ពន្លកសណ្ដែកសៀងចាប់ផ្ដើមដុះចេញពីពន្លកត្រួយ។
ច. បច្ចេកទេសដាំ
- ត្រូវយកគ្រាប់ពូជទៅហាលថ្ងៃចំនួន ១-២ម៉ោង។ ធ្វើដូចនេះអាចឲ្យគ្រាប់សណ្ដែកឆាប់ដុះបានលឿនពេលដាក់គ្រាប់ទៅក្នុងដី។
- តាមក្បួនខ្នាតគេដាំពីជួរមួយទៅជួយមួយទៀតគម្លាត ៤០ស.ម ទៅ ៤៥ស.ម
- ពីគុម្ពមួយ ទៅគុម្ពមួយ ២០ស.ម ទៅ ៣០ស.ម
- រណ្ដៅនីមួយៗ យើងដាក់គ្រាប់ ២-៣គ្រាប់ និងមានជំរៅ ៣-៤ស.ម រួចយកដីម៉ដ្ឋ ឬជីលាយជីកំប៉ុស្តលុបឲ្យជិតពីលើគ្រាប់សណ្ដែក រួចយកដៃទះបន្ថែមស្រាលៗ ដើម្បីធ្វើឲ្យគ្រាប់សណ្ដែកស្រូបយកសំណើមបានល្អ។
- បច្ចុប្បន្ននេះកសិករមួយចំនួនបានដាំដោយប្រើម៉ាស៊ីនស្វ័យប្រវត្តិលើចំការធំៗ៕
អត្ថបទដោយ៖ សែន តុលា
ប្រភព៖ ឯកសារក្រសួងកសិកម្ម
- Advertisement -
![Advertisement]()