បាញ់ថ្នាំពុលកសិកម្មបែបណាទើបមិន​សូវប៉ះពាល់សុខភាព?

- Advertisement -

ដោយសារតែបញ្ហាកត្តាចង្រៃបំផ្លាញទៅលើដំណាំ ទើបធ្វើឲ្យមានការកើនឡើងនៃការប្រើប្រាស់ថ្នាំពុលគីមីដើម្បីកំចាត់នូវពពួកកត្តាចង្រៃទាំងនោះ។

ជាការពិតណាស់ថ្នាំពុលទាំងនោះមិនត្រឹមតែពុលទៅលើកត្តាចង្រៃទេ តែវាក៏ប៉ះពាល់ទៅលើសុខភាពរបស់អ្នកប្រើប្រាស់ផងដែរ។

អ្នកប្រើប្រាស់ថ្នាំពុលមួយចំនួនគិតថា​ ការប្រើប្រាស់ថ្នាំពុលតិចតួចវាមិនប៉ះពាល់អ្វីនោះទេ ទើបមានការធ្វេសប្រហេសក្នុងការការពារខ្លួនឲ្យបានត្រឹមត្រូវ។

ការប្រើប្រាស់ថ្នាំពុលមិនបានត្រឹមត្រូវនឹងបណ្ដាលឲ្យប៉ះពាល់ដល់សុខភាព ហើយវាក៏អាស្រ័យទៅតាមកម្រិតពុលរបស់ថ្នាំ និងកម្រិតសុខភាពរបស់អ្នកប្រើប្រាស់ដូចគ្នា។

អ្នកប្រើប្រាស់ត្រូវអនុវត្តន៍ការប្រើប្រាស់ថ្នាំឲ្យបានត្រឹមត្រូវ ដើម្បីបង្ការនិងការពារសុវត្ថិភាព​សុខភាព។ មានចំណុចមួយចំនួនដែលអាចជួយឲ្យកសិករប្រើប្រាស់ថ្នាំពុលឲ្យបានត្រឹមត្រូវ៖

• ការលាយថ្នាំ ត្រូវលាយនៅកន្លែងដែលមានខ្យល់ចេញចូលល្អ
• ជៀសវាងការលាយថ្នាំឲ្យលើសពីតម្រូវការ
• ត្រូវលាយតាមកម្រិតណែនាំដែលមាននៅលើកញ្ចប់ថ្នាំ
• អ្នកបាញ់ថ្នាំត្រូវពាក់ម៉ាស់ អាវជិតៗ បើអាចត្រូវទិញអាវការពារពេលបាញ់ថ្នាំ
• ហាមដាច់ខាតជក់បារី​ ផឹកទឹក ឬទទួលទានចំណីអាហារអំឡុងពេលបាញ់ថ្នាំឬនៅជិតកន្លែងបាញ់ថ្នាំ
• ការបាញ់ថ្នាំត្រូវបាញ់នៅពេលដែលមេឃត្រជាក់ លើកទឹកចិត្តឲ្យបាញ់នៅពេលរសៀល
• ពេលបាញ់ អ្នកបាញ់​ត្រូវតែឈរពីខាងលើខ្យល់ ជៀងវាងការនៅក្រោមខ្យល់ដែលអាចបណ្ដាលឲ្យខ្យល់បក់ថ្នាំមក​ត្រូវ​ខ្លួន​
• ឧបករណ៍ដែលប្រើពេលបាញ់ថ្នាំ ត្រូវលាងសម្អាតឲ្យបានស្អាតល្អ និងមិនត្រូវយកទៅប្រើប្រាស់បន្តក្រៅពីទុកបាញ់ថ្នាំនោះទេ
• បន្ទាប់ពីបាញ់ថ្នាំរួច អ្នកបាញ់ថ្នាំត្រូវសម្អាតខ្លូនឲ្យបានស្អាតជាមួយសាប៊ូ។

អត្ថបទដោយ៖ Kakse/កសិ

- Advertisement -