កសិដ្ឋានចិញ្ចឹមមាន់យកពងនៅតាមខេត្តមួយចំនួនក្នុងប្រទេសថៃមានការរងប៉ះពាល់នឹងកម្ដៅ និងកង្វះទឹក ដែលជាលទ្ធផលបានធ្វើឲ្យកសិដ្ឋានរបស់ពួកគេផលិតបាននូវពងមាន់តូចៗ និងមានតិច ដោយផលនៃពងមាន់ ៥០% មានទម្ងន់ ៥៥-៥៩ក្រាម ក្នុងមួយគ្រាប់ ឬក៏អាចតិចជាងនេះ។
យ៉ាងណាដើម្បីឆ្លើយតបនឹងបញ្ហាមួយនេះជូនប្រជាកសិករទូទៅ សារព័ត៌មាន Asian Agribiz បានធ្វើការសម្ភាសន៍កសិករជនជាតិថៃ ដែលមានបទពិសោធន៍ជើងចាស់ម្នាក់ដើម្បីបង្ហាញពីបទពិសោធន៍ និងវិធីសាស្ត្រដែលលោកឆ្លើយតបនឹងបញ្ហានេះ។
អ្នកមានបទពិសោធន៍ខាងកសិកម្មម្នាក់នេះបានរៀបរាប់ពីសារៈសំខាន់ និងតួនាទីនៃដំបូលដែលប្រក់ពីលើកសិដ្ឋានទាំងនោះ ដោយលោកបានធ្វើការលើកឡើងថាអ្វីដែលសំខាន់នោះគឺដំបូងនោះត្រូវភ្ជាប់នឹងអ៊ីសូឡង់ការពារកម្ដៅ និងធ្វើយ៉ាងណាឲ្យកសិដ្ឋាននោះមានខ្យល់ចេញចូល ៣,៥ ម៉ែត្រ/វិនាទី។
កសិករទាំងអស់ត្រូវមានឧបករណ៍ឲ្យបានគ្រប់សព្វសម្រាប់កសិដ្ឋានរបស់ខ្លួនដូចជា កង្ហារ ម៉ាស៊ីនបូមទឹក និងទ្រនាប់ត្រជាក់ ដែលឧបករណ៍ទាំងនោះត្រូវតែដំណើរឲ្យបានត្រឹមត្រូវជាទីបំផុត។
ទុយយោបូមទឹកត្រូវធ្វើយ៉ាងណាមានទ្រនាប់ការពារពីកម្ដៅថ្ងៃ និងកប់នៅក្រោមដី ព្រោះតែបើរៀបចំទុយយោទឹកនេះមិនសមស្របទេនោះនឹងធ្វើឲ្យទឹកដែលបូមមកមានកម្ដៅក្ដៅ។ កាលណាទឹកក្ដៅ សត្វមាន់នឹងផឹកទឹកតិច និងធ្វើឲ្យកម្ដៅនៅក្នុងកសិដ្ឋាន ឬក៏ទ្រុងនោះកាន់តែក្ដៅ។
លោកក៏បានឲ្យយោបល់ថា៖” បើសិនជាថ្ងៃណាមានកម្ដៅខ្លាំងពេក នោះសត្វមាន់នឹងមិនស៊ីចំណីនៅពេលថ្ងៃក្ដៅនោះទេ អីចឹងហើយយើងមានកែសម្រួលរឿងលេងពន្លឺ ដែលវាទាមទារឲ្យយើងត្រូវចេះបិទភ្លើងប្រហែល ៤ម៉ោងនៅពេលថ្ងៃ និងបើកភ្លើងវិញនៅពេលយប់អីចឹងហើយអាចធ្វើឲ្យសត្វមាន់ស៊ីចំណីនៅពេលយប់នោះ។
លោកក៏បានឲ្យយោបល់ផងដែរ អ្វីដែលសំខាន់លើសពីនេះទៀតនោះគឺត្រូវចេះរៀបដង់ស៊ីតេមាន់រវាងខែត្រជាក់ និងខែក្ដៅ។ ឧទាហរណ៍ បើខែត្រជាក់យើងដាក់មាន់ ក្នុងមួយម៉ែត្រការ៉េ ១១ក្បាល ដល់ពេលខែក្ដៅយើងដាក់ត្រឹម ១០ក្បាល/ម៉ែត្រការ៉េ។
មិនតែប៉ុណ្ណោះលោកក៏បានបញ្ជាក់លើបញ្ហាផ្គត់ផ្គង់ទឹកស្អាតដល់សត្វមាន់ដែលយើងចិញ្ចឹមឲ្យបានដិតដល់ជាទីបំផុត ក្នុងខែក្ដៅ ធ្វើយ៉ាងណាឲ្យមានទឹកឲ្យគ្រប់គ្រាន់ ទោះជាក្នុងករណីប្រព័ន្ធទឹកខួចយ៉ាងណាក៏ដោយ។
អ្នកមានបទពិសោធន៍ខាងចិញ្ចឹមមាន់ជនជាតិថៃរូបនេះបានធ្វើការរៀបរាប់ពីកសិដ្ឋានរបស់លោក ដោយលោកបានផ្គត់ផ្គង់ទឹកគ្រប់គ្រាន់ ថែមទាំងមានម៉ាស៊ីនចម្រោះទឹកថែមទៀតផង។ លោកបានលើកឡើងថា ធ្វើយ៉ាងណាត្រៀមទាក់ទងក្រុមហ៊ុន និងអាជ្ញាធរដើម្បីផ្គត់ផ្គង់ទឹកឲ្យយើងឲ្យបានត្រឹមត្រូវក្នុងករណីចាំបាច់ណាមួយបំផុត ដែលយើងត្រូវការ៕
អត្ថបទដោយ៖ សែន តុលា
ប្រភព៖ Asian Agribiz