ពងក្រួចក៏ជាអាហារពេញនិយមមួយដូចពងមាន់ពងទាដែរ។ ដោយតម្រូវការហូបចុកនេះ ធ្វើឲ្យការចិញ្ចឹមក្រួចយកពង កំពុងមានការចាប់អារម្មណ៍ ពីសំណាក់បងប្អូនយើងមួយចំនួន។ សម្រាប់បបងប្អូនដែល កំពុងចង់បង្កើតមុខរបរថ្មី ឬឬរកមុខរបរបន្ថែម អាចសាកល្បងចិញ្ចឹមក្រួច ជាពិសេសការចិញ្ចឹមក្រួចយកពង ឬចង់ចិញ្ចឹមមេបាក្រួចសម្រាប់លក់។
មុខរបរចិញ្ចឹមក្រួចយកពង ជាមុខរបរដែលបងប្អូនកសិករមិនគួរមើលរំលងនោះទេ ព្រោះក្រៅពីការមានកិច្ចការស្នូលហើយ យើងអាចឆ្លៀតពេលទំនេរចិញ្ចឹមក្រួចនៅផ្ទះក៏បាន ដែលវាងាយស្រួល ក្នុងការគ្រប់គ្រងនៅផ្ទះ ទោះបីជាបងប្អូនមានដីទំនេរតូចល្មម ក៏អាចចីញ្ចឹមបានដែរ។
ម្យ៉ាងទៀត ការចិញ្ចឹមក្រួចយកពង ឆាប់បានប្រមូលផល តម្លៃលក់នៅលើទីផ្សារសមរម្យ។ ដូច្នេះសម្រាប់បងប្អូន មានបំណងចង់បង្កើតមុខរបរ ជាប្រភពចំណូលបន្ថែម សម្រាប់ក្រុមគ្រួសារ អាចពិចារណាចំពោះមុខរបរចិញ្ចឹមក្រួចយកពងនេះបានដើម្បីបង្កើនចំណូលគ្រួសារ។
១.រោងសម្រាប់ចិញ្ចឹមក្រួចពង
- រោងសម្រាប់ចិញ្ចឹមក្រួច អាចសង់ឡើង ឲ្យខ្ពស់ពីដីក៏បាន ឬអាចចិញ្ចឹមវានៅលើដីផ្ទាល់ ឬអាចធ្វើជាកម្រាលក្រាល ដោយសំណាញ់ភ្នែកក្រួច ទៅតាមលទ្ធភាពដែលអ្នកមាន។
- ដំបូលរោងគួរប្រក់ស្លឹក ឬស្បូវដើម្បីកាត់បន្ថយកំដៅ បើប្រើស័ង្កសីសម្រាប់ប្រក់ គួរតែធ្វើដំបូលនោះឱ្យខ្ពស់បន្ដិច ដើម្បីកាត់បន្ថយកំដៅនៅខែប្រាំង។
- ជញ្ជាំងទ្រុងអាចធ្វើពីសំណាញ់យ៉ាំងកាវ ឬសំណាញ់ភ្នែកក្រួច ក៏បានបើមានលទ្ធភាព តែបើមិនមានលទ្ធភាព ទេអាចត្បាញជាព្រួល ដើម្បីធ្វើជាជញ្ជាំងឱ្យវាក៏បាន។
- ក្រួចត្រូវការទីកន្លែងតូច មិនចាំបាច់ត្រូវមានទីធំដូចជាមាន់ទាឡើយ ទីតាំងអាចមានទំហំ ១ ម៉ែត្រក្រឡាអាចឱ្យ យើងដាក់ក្រួចបានចំនួន១០០ក្បាល។
- ត្រូវជ្រើសរើសទីកន្លែងណាមួយដែលសមស្របបំផុត ទីទួល ទីស្រឡះមានខ្យល់ចេញចូលបានល្អ មានពន្លឺថ្ងៃចូលដល់ និងមានប្រភពទឹកស្អាត សម្រាប់ផ្គត់ផ្គង់។
២.ទ្រុងសម្រាប់មេពងផ្ទាល់ដី
- មេក្រួចច្រើន អាចដាក់ទ្រុងផ្ទាល់ដីបាន
- ៣-៥ថ្ងៃ ត្រូវបោសលាមកម្តង
- ត្រូវកាត់ចំបើងខ្លី ឬស្លឹកឈើស្ងួតក្រាលបាតទ្រុង
- ត្រូវក្រាលអង្កាមបាតទ្រុងឲ្យក្រាស់
- សីតុណ្ហភាពទ្រុង ចន្លោះ ពី២៨-៣២°C
៣.ទ្រុងសម្រាប់មេពងជាទ្រុងសំណាញ់ផុតដី
- ធ្វើទ្រុងសំណាញ់ ពីឬស្សី ឈើ ដែក ផុតពីដី កម្ពស់យ៉ាងបោច ០,៥-០,៨ ម៉ែត្រ ដើម្បីងាយស្រួល
- ទ្រុងមានបណ្តោយ ២,៧ ម៉ែត្រ X ទទឹង ១,៧ម៉ែត្រ សម្រាប់ក្រួចមេ ចំនួន ១៨០-២០០ក្បាល
- ១ម៉ែត្រការ៉េ ៣៥-៤០ក្បាល ដើម្បីឲ្យក្រួច ងាយស្រួលដើរ និងស៊ីចំណី
- ផ្ទៃបាតទ្រុង មានសភាពរាបស្មើល្អ ងាយស្រួលរើសពង
- សម្អាតទ្រុង ១ថ្ងៃម្តង ទ្រុងសំណាញ់ ងាយបោសសំអាត
៤.ការបង្កាត់ពូជ
- ក្រួចចាប់ផ្តើម បង្កាត់ពូជ នៅអាយុ ៤៥-១២០ថ្ងៃ ជាមធ្យម៦០ថ្ងៃ
- យកក្រួចឈ្មោល ដាក់ក្នុងទ្រុងក្រួចញី ដោយសមាមាត្រ ឈ្មោល១ ញី៣
- ស៊ុតក្រួច មានអត្រាបង្កកំណើត គឺប្រមូលមកពី មេបាពូជ មានអាយុ ៧០-១២០ថ្ងៃ
- អត្រាបង្កកំណើត មធ្យម ៧៣%
- អាយុកាល ប្រើមេបាពូជ ចន្លោះ ៦-១២ខែ ក្រោយពីថ្ងៃបង្កាត់ អាយុជាមធ្យម ៩ខែ
- បន្ទាប់ពីបង្កាត់មក ក្រួចញីអាចចិញ្ចឹមយកស៊ុតបាន មួយរយៈទៀត ឬជំរុះ លក់ក្រួចសាច់ ជាមួយក្រួចឈ្មោលតែម្តង។
៥.ការផ្ដល់ចំណី
- ចំណីមិនត្រូវឱ្យខ្វះឡើយ បើពុំនោះទេកូនដែលញាស់ មកវាទន់ជើង គឺបណ្ដាលមកពីការឱ្យចំណី ដល់មេវាមិនបានគ្រប់គ្រាន់។
- សម្រាប់ចំណីលាយខ្លួនឯង អាចលាយកន្ទក់ម៉ត់លេខមួយ ឬប្រើពោតក្រហម ដើម្បីលាយបន្ថែម ជាមួយចំណីមាន់ទិញមកស្រាប់ នោះក្នុងអត្រា ១០ ភាគរយ។
- លាយកន្ទក់ម៉ត់ លេខមួយ១៥% ឬប្រើពោតក្រហម ១០% មកលាយបន្ថែមជាមួយចំណី មាន់ទិញមកស្រាប់។
- កន្ទក់ ជួយបង្កើនសាច់ ឲ្យឆាប់ធំធាត់ ពោតជួយបង្កើនការលូតលាស់
- ក្រួចមួយក្បាល អាយុ ៥សប្ដាហ៍ស៊ីចំណីអស់ប្រមាណជា ៥០០ ក្រាម
- ក្រួច អាយុ ៦ខែ ស៊ីចំណី ប្រហែល ៣០-៣៥ក្រាម/ថ្ងៃ/ក្បាល
បងប្អូនអ្នកចិញ្ចឹមក្រួចយកពង ឬយកសាច់ មានអ្វីចង់ចែករំលែក កុំស្ទាក់ស្ទើរក្នុងការទាក់ទងមកក្រុមការងារកសិ/Kakse។
ចែករំលែកដោយ៖ ឡឹក គឹមសួរ
ប្រភព៖ vikaspedia