ការចិញ្ចឹមគោ គឹតម្រូវឲ្យមានការយកចិត្តទុកដាក់ខ្ពស់មិនថា កូនគោ មេគោ គោជំទង់ ឬក៏គោបាឡើយ។ ដូច្នេះហើយកសិករ ឬអ្នកចិញ្ចឹមគោអាចនឹងជួបបញ្ហាតិចឬច្រើន អាស្រ័យលើការចិញ្ចឹម និងការថែទាំផ្សេងៗ។ ក្នុងចំណោមបញ្ហាទាំងអស់នោះយើងសង្កេតឃើញថា មេគោចុះស្គមក្រោយកើតកូនរួច វាជាបញ្ហាចម្បងដែលប្រជាកសិករ និងអ្នកចិញ្ចឹមគោតែតែជួបប្រទះ។ តើមូលហេតុអ្វីបានជាមេគោស្គមក្រោយកើតកូនរួច? តើគួរធ្វើបែបណា?
+ មុនពេលកើត
- ក្រពះចាប់ផ្តើមដំណើរការកាន់តែច្រើនជាងមុន
- ដោះចាប់ផ្ដើមឡើងធំ
- កូននៅក្នុងពោះលូតលាស់ច្រើនក្នុងអំឡុងពេលនេះ
- មុខងារនៃប្រព័ន្ធការពាររាងកាយត្រូវបានទាញទៅជំរុញដើម្បីផលិតជាតិទឹកដោះ
- ការប្រែប្រួលអ័រម៉ូនត្រៀមកើតកូន
- គោតានតឹងនៅពេលកើតកូន។
+បន្ទាប់ពីកើតកូនរួច
- ការស៊ីចំណីអាហារនឹងតិចជាងធម្មតា ឬថយចុះដោយសារតែ៖
- ការប្រើប្រភេទចំណីដែលស្ងួតពេកដូចជាចំបើងជាដើម
- ការបញ្ចេញអាំងស៊ុយលីនច្រើនជាងមុន
- ដំណើរការនៃប្រតិកម្មមេតាប៉ូលីសកើនឡើង ដោយសំយោគកោសិកាខ្លាញ់ដែលផ្ទុកថាមពលដែលផ្ដល់ទៅឲ្យក្រពេញទឹកដោះដើម្បីផលិតទឹកដោះ។
- បញ្ហាប្រព័ន្ធរំលាយអាហារ និងបញ្ហាសុខភាពគោ
- បាត់បង់ជាតិកាល់ស្យូមច្រើន ដោយសារការផលិតទឹកដោះ និងទឹកដោះដំបូង
- ស្បូន និងអូវែត្រូវចាប់ផ្ដើមត្រឡប់មកដូចដើម និងដំណើរការឡើងវិញ។ ត្រង់ចំណុចមានន័យថាថាមពល សារធាតុចិញ្ចឹម… ផ្សេងៗ ត្រូវបានផ្គត់ផ្គង់ទៅផ្នែក ឬប្រព័ន្ធបន្តពូជដើម្បីឲ្យមានសភាពដូចដើម និងប្រកតីវិញ។
- បរិមាណទឹកដោះគោនឹងចាប់ផ្តើមកើនឡើងជាលំដាប់
តើអ្នកចិញ្ចឹមទាំងអស់គ្នាឃើញទេថាមានរឿងជាច្រើនកើតឡើងមុននិងក្រោយពេលគោកើតកូន?
ជាទូទៅបញ្ហាទាំងអស់នេះគេអាចមើលឃើញបន្ទាប់ពី ២១ថ្ងៃ ក្រោយកើតកូន គឺមានការរផ្លាស់ប្តូរ ដែលបានកើតឡើងគួរឲ្យកត់សម្គាល់ដែលបង្កបញ្ហាជាច្រើនដល់សត្វគោ។ ដោយសារតែគោស៊ីតិច ប៉ុន្តែត្រូវតែផលិតទឹកដោះឲ្យបានច្រើន មូលហេតុទាំងនេះហើយដែលបង្កឲ្យសត្វគោចុះស្គមបានយ៉ាងងាយក្នុងអំឡុងពេលនេះ។
+ ដំណោះស្រាយ និងការណែនាំសម្រាប់ការថែទាំសត្វគោក្នុងអំឡុងពេលនេះ
១. ត្រូវយកចិត្តទុកដាក់ជាពិសេសចំពោះសត្វគោក្នុងអំឡុងពេលនេះ ដោយផ្ដល់នូវចំណីដែលមានគុណភាព សម្បូរទៅដោយសារធាតុចិញ្ចឹមខ្ពស់ យើងត្រូវដាក់មេគោ និងកូនគោដាច់ដោយឡែកពីហ្វូង ហើយសម្អាតក្រោលជាប្រចាំ។
២. សត្វគោ ជាធម្មតានឹងស៊ីចំណីតិចក្នុងអំឡុងពេលក្រោយកើតកូនរួច ដូច្នេះយើងគួរតែរកវិធីដើម្បីធានាថា គោនៅតែទទួលបានអាហារូបត្ថម្ភគ្រប់គ្រាន់។
- ឧបមាថា ពីមុនយើងឲ្យគោស៊ីចំបើង១០គីឡូ តែយើងអាចប្តូរមកដាក់ ដើមពោតស្រស់ ឲ្យគោស៊ីជំនួសវិញត្រឹមតែ ៥គីឡូ
- ប្រសិនបើយើងធ្លាប់ប្រើចំណីក្រុមហ៊ុនដែលមានប្រូតេអ៊ីន ១៦% ឲ្យគោស៊ី ៦គីឡូក្រាម ក្នុងមួយថ្ងៃ យើងអាចប្តូរទៅជាចំណីក្រុមហ៊ុនដែលមានប្រូតេអ៊ីន ២១% ឲ្យគោស៊ី ៣គីឡូក្រាម ក្នុងមួយថ្ងៃជំនួសវិញ។
- បើយើងធ្លាប់ឲ្យគោស៊ីស្មៅ ៣០គីឡូក្រាម ក្នុងមួយថ្ងៃ យើងអាចបន្ថែមសារធាតុចិញ្ចឹម និងចំណីស្រស់ផ្សេងៗទៀតដូចជា ដើមពោត ស្លឹកដំឡូង និងប្រភេទស្មៅចំណីសត្វបាន។ សរុបមកយើងត្រូវធ្វើយ៉ាងណាដើម្បីឱ្យសត្វគោទទួលបាន ” សារជាតិចិញ្ចឹម ” ច្រើនបំផុតក្នុងអំឡុងពេលនេះ។
៣. យើងអាចចាក់ពពួកវីតាមីនដូចជា វីតាមីន ADE, E, ឬសេលេញ៉ូមអាចត្រូវបានផ្តល់ឱ្យក្នុងអំឡុងពេលនេះដើម្បីទប់ស្កាត់បញ្ហាប្រព័ន្ធបន្តពូជដែលនឹងកើតឡើង។ ត្រង់ចំណុចនេះ កសិករយើងគួរប្រឹក្សាជាមួយពេទ្យសត្វជំនាញ។
៤. សង្កេតលើរាងកាយរបស់គោមានដូចជា ឆាប់ស្រកសាច់ ឆ្អឹងជំនីលេចចេញច្បាស់ជាងមុន នៅចន្លោះឆ្អឹងជំនីផ្នែកខាងក្រោយនិងឆ្អឹងត្រកៀកមានលក្ខណៈផតជាងមុន និងយកចិត្តទុកដាក់ការស៊ីចំណីរបស់គោ ព្រមទាំងពិនិត្យសុខភាពរបស់គោជាប្រចាំមានដូចជា បញ្ហារលាកក្បាលដោះ ការរលាកស្បូន អាចមានដំបៅក្នុងមាត់ មិនព្រមស៊ីចំណីជាដើម។
ដូចគ្នាដែរ ម្ចាស់ត្រូវតែយកចិត្តទុកដាក់ជាពិសេសក្នុងអំឡុងពេលក្រោយកើតកូន គឺមិនគ្រាន់តែការផ្តល់ចំណីដែលមានបរិមាណច្រើននោះទេ តែចំណីដែលផ្ដល់ឲ្យត្រូវតែមានសារជាតិចិញ្ចឹមគ្រប់គ្រាន់ និងមានគុណភាពផងដែរ។ ដើម្បីឲ្យសុខភាពគោបានប្រសើឡើងវិញ ប្រកបដោយប្រសិទ្ធភាព ហើយក៏ធ្វើឲ្យគោមិនងាយឈឺ ឬទ្រុឌទ្រោម និងឆាប់បានដាក់បា ឬបង្កាត់ពូជផងដែរ ។
សម្រាប់អ្នកចិញ្ចឹមគោផ្សេងទៀត បើបង់ចែករំលែកបទពិសោធចិញ្ចឹមគោ កុំភ្លេចទាក់ទងមកកសិ/Kakse។
ចែករំលែកដោយ៖ ឡឹក គឹមសួរ
ប្រភព៖ Sciencedirect