ការធ្វើស្រែចម្ការ បងប្អូនកសិករតែងតែជួបប្រទះរុក្ខជាតិចង្រៃមួយចំនួន ដែលតែងតែយារយីដំណាំ និងផលិតកម្មកសិកម្មរបស់យើង។ បើយោងតាមការស្រាវជ្រាវរបស់មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ រុក្ខជាតិចង្រៃនៅស្រុកយើងមានរហូតទៅដល់ ៧០ប្រភេទ។ រុក្ខជាតិមួយចំនួនអាចជាមានលក្ខណៈជាស្មៅនិងកក់ ដែលរួមមាន ស្មៅគោ ស្មៅចិញ្ចៀន ហើយមួយចំនួនទៀតជាប្រភេទស្លឹកធំរួមមាន ផ្ទីបន្លា ឬ ផ្ទីដូង និងប៉េងប៉ោះស្រោមជាដើម។
តាមពិតទៅ រុក្ខជាតិទាំងនោះដើមឡើយមិនត្រូវបានចាត់ទុកជាកត្តាចង្រៃមកដល់ដំណាំស្រូវ និងដំណាំក្នុងចម្ការរបស់យើងទេ តែការវិវត្តនានាតាមរយៈការប្រែប្រួលអាកាសធាតុ និងការផ្លាស់ប្ដូរវិធីសាស្ត្រក្នុងការធ្វើកសិកម្មរបស់យើង រុក្ខជាតិទាំងនោះបានវិវត្តខ្លួនមកជាកត្តាយារយីទៅលើផលិតផលកសិកម្មរបស់បងប្អូនកសិករ។
ខាងក្រោមនេះជាវិធីសាស្ត្រមួយចំនួនក្នុងការគ្រប់គ្រងរុក្ខជាតិចង្រៃ៖
ការអនុវត្តបែបប្រពៃណី៖ ការគ្រប់គ្រងបែបប្រពៃណីគឺ ការកម្ចាត់រុក្ខជាតិចង្រៃដោយដៃ ការរៀបចំដី និងការទទួលយករុក្ខជាតិចង្រៃក្នុងចម្ការ។
ការអនុវត្តវិធានការគ្រប់គ្រងបែបចម្រុះ៖ នៅក្នុងវិធីសាស្ត្រនេះ បងប្អូនកសិករយើងអាចប្រើប្រាស់គ្រប់វិធីសាស្ត្រនានា ដើម្បីកម្ចាត់រុក្ខជាតិចង្រៃ។ វិធីសាស្ត្រទាំងអស់នោះមានគោលបំណងធ្វើយ៉ាងណារក្សារុក្ខជាតិចង្រៃឱ្យមានតិចតួច និងការពារកុំឱ្យដាក់គ្រាប់រីករាលដាលពេញមួយវដ្ដដំណាំ។ រុក្ខជាតិមួយចំនួនអាចប្រើប្រាស់ជាចំណីសត្វ ឬ ក៏អាចប្រើប្រាស់ជាបន្លែសម្រាប់បរិភោគ។
ក្នុងការអនុវត្តវិធីសាស្ត្រនេះ យើងត្រូវតែគិតគូរមុនពេលដាំដំណាំ ដោយយើងត្រូវគ្រប់គ្រងកុំឱ្យមានរុក្ខជាតិចង្រៃនៅតាមព្រំចម្ការ បណ្ដោយចង្អូរទឹក និងដីទំនេរជិតចម្ការដំណាំ។ មួយវិញទៀត ប្រសិនបើដាំដំណាំហើយ យើងពិបាកក្នុងការកម្ចាត់រុក្ខជាតិចង្រៃទាំងអស់នោះណាស់ ដោយរុក្ខជាតិខ្លះដុះជាឫស ឬជាមើមក្នុងដី។
ការធ្វើជាចំណីសត្វ៖ រុក្ខជាតិចង្រៃមួយចំនួនដូចជា ប្រភេទស្មៅ អាចដាក់ឱ្យសត្វស៊ីដោយផ្ទាល់ ឬ ច្រូតយកឱ្យសត្វស៊ី។
ការអនុវត្តតាមបែបក្សេត្រសាស្ត្រ ឬ តាមបច្ចេកទេសកសិកម្ម៖ ការអនុវត្តបែបនេះគឺយើងមើលចាប់តាំងពីការជ្រើសរើសពូជ និងជ្រើសរើសគ្រាប់ក្នុងការសាបព្រោះ។ ចំពោះការពិនិត្យមើលគ្រាប់ពូជដំណាំ យើងត្រូវធ្វើយ៉ាងណា ឱ្យគ្រាប់របស់យើងស្អាតល្អ និងមិនឱ្យគ្រាប់របស់យើងជាប់លាយជាមួយនឹងគ្រាប់រុក្ខជាតិដទៃទៀត។ ការជ្រើសរើសគ្រាប់ពូជបានល្អអាចធ្វើឱ្យដំណាំរបស់យើងដុះលូតលាស់លឿន និងធន់នឹងរុក្ខជាតិចង្រៃផ្សេងទៀត៕
ប្រភព៖ Agri Tech