ការកែច្នៃស្លឹកដំឡូងមីទៅជាចំណីសត្វ មិនត្រឹមតែផ្ដល់នូវសារជាតិចិញ្ចឹមល្អៗដល់គោ ប៉ុណ្ណោះទេ តែក៏ជួយសន្សំសំចៃថវិកាផងដែរ។ សារជាតិចិញ្ចឹមដែលមាននៅក្នុងស្លឹកដំឡូងមី អាចជួយឲ្យសត្វមានការលូតលាស់ល្អ រឹងមាំ និងមានសមត្ថភាពបន្តពូជល្អ ព្រមទាំងជំនួយដល់ការរំលាយអាហារ។
ចំណុចសំខាន់ៗនៅក្នុងការកែច្នៃស្លឹកដំឡូងមីរួមមាន ការប្រមូលផលស្លឹកដំឡូងមី ការយកស្លឹក និងមើមដំឡូងមីមកហាលឲ្យស្ងួតដើម្បីធ្វើចំណីគោ ការរក្សាទុស្លឹកដំឡូងមីស្ងួត និងរៀបធ្វើជាចំណី។
ការប្រមូលផលដំឡូងមី
ការប្រមូលផលស្លឹកដំឡូងមីស្ងួតគឺក្រោយដាំបាន៤ខែ បន្ទាប់មកប្រមូលម្ដង២ខែ រហូតដល់ប្រមូលផលមើម។
ការយកស្លឹក និងកាហាលសម្ងួត
នៅក្នុងដំណាក់កាលនេះយើងត្រូវចិញ្ច្រាំចុង និងស្លឹកដំឡូងមី។ មែកខាងចុង និងស្លឹកដំឡូងមី ដែលកាច់បានត្រូវចិញ្ច្រាំឲ្យល្អិតៗ ឬកំណាត់ខ្លីៗ។ សំខាន់បំផុតមិនត្រូវដាក់ចូលស្លឹកណា ដែលឡើងពណ៌លឿងទេ ព្រោះអាចធ្វើឲ្យខូចគុណភាព។ បន្ទាប់ពីការចិញ្ច្រាំរួចរាល់ យើងហាលវាស្ដើងៗលើកំរាល នៅលើទីលាតឲ្យបានល្អ។ ដោយអាចហាលើកៅស៊ូតង់ ឬស័ង្កសីជាដើម។
បន្ទាប់ពីហាលស្ងួតត្រូវច្រកចូលប៉ាវ ឬការ៉ុង។ បើស្លឹកស្ងួតមិនត្រូវទឹក គឺអាចទុកបានរហូតដល់៦ខែ ដោយមិនខូចគុណភាព។
របៀបធ្វើជាចំណី
បេះស្លឹក និងទងពីដើមដំឡូងរួចយកទៅហាលថ្ងៃបន្តិច (ពី៣-៤ម៉ោង អាស្រ័យលើអាកាសធាតុ)។ ក្នុងស្លឹក១០គីឡូ លាយជាមួយស្ករត្នោត ០,៥គីឡូ និងទឹក ០,៥លីត្រ។ ច្របល់ចូលគ្នាឲ្យសព្វ ច្រកចូលទៅក្នុងថង់ប្លាស្ទិក រួចច្របាច់យកខ្យល់ចេញឲ្យអស់។ បន្ទាប់មកចង់មាត់ថង់ជាមួយពោះវៀនកៅស៊ូកង់ ដាក់ចូលពាង ឬកប់ក្នុងដី។
គួរបញ្ជាក់ផងដែរក្រោយពេលផ្អាប់ពី ២៥ទៅ៣០ថ្ងៃ អាចយកស្លឹកដំឡូងផ្អាប់ឲ្យសត្វស៊ីបាន។ ក្នុងគោមួយក្បាលអាចផ្ដល់ពី ៣-៥គីឡូក្នុងមួយថ្ងៃ។ ស្លឹកដំឡូងផ្អាប់អាចរក្សាទុកបានរយៈពេល៦ខែ៕
បងប្អូនណាខ្លះ និមយយកស្លឹកដំឡូងមីមកធ្វើជាចំណីគោ? ចែករំលែកចំណេះដឹងជាមួយកសិ/Kakse ផង។
ប្រភព៖ ឯកសារក្រសួងកសិកម្ម