ហេតុអ្វីដំណាំបងប្អូនឡើងខ្លោចក្រោយបាញជីលាមកមាន់? ការដែលដំណាំខ្លោចស្លឹកនេះ គឺបណ្តាលមកពីមូលហេតុចម្បងពីរពីសំខាន់ គឺទីមួយមកពីកំហាប់អាសូតខ្ពស់ពេក និងទីពីរគឺការបញ្ចេញឧស្ម័នអាម៉ូញ៉ាក់។
១. កំហាប់អាសូតខ្ពស់ខ្លាំង
លាមកមាន់ត្រូវបានគេចាត់ទុកជាជី “ក្តៅ” ព្រោះវាមានកំហាប់អាសូតខ្ពស់ជាងលាមកសត្វដទៃទៀត ដូចជាលាមកគោ ឬជ្រូក ជាពិសេសប្រសិននៅពេលកសិករយើងបើប្រើលាមកវានៅស្រស់ៗ ឬមិនទាន់រលួយអស់។
ក្នុងជីលាមកមាន់មានជាតិអាសូតខ្ពស់។ នៅពេលមានអាសូតច្រើនលើសលប់នៅក្នុងដី វាបង្កឱ្យមានបាតុភូតអូស្មូសបញ្ច្រាស ដែលអាសូតលើសនោះបានបឺតយកជាតិទឹកចេញពីឫសរបស់ដំណាំ។ ជាលទ្ធផល ដំណាំនឹងខ្សោះជាតិទឹកយ៉ាងលឿន ហើយរោគសញ្ញានោះបង្ហាញចេញតាមស្លឹកដោយប្រែជា លឿង ឬ ត្នោត នៅគែមៗស្លឹក រួចរាលដាលទៅខ្លោច និងក្រៀមស្វិត។
២. ការបញ្ចេញឧស្ម័នអាម៉ូញ៉ាក់
លាមកមាន់ស្រស់មានផ្ទុកអាម៉ូញ៉ាក់ខ្ពស់។ នៅពេលដែលលាមកស្រស់ចាប់ផ្តើមរលួយនៅក្នុងដី ឬនៅលើផ្ទៃដីក្បែរដំណាំ វាបញ្ចេញឧស្ម័នអាម៉ូញ៉ាក់។
ឧស្ម័នអាម៉ូញ៉ាក់មានជាតិពុល ដែលអាចដុតបំផ្លាញជាលិការុក្ខជាតិទាំងស្លឹក ដើម និងឫសដែលនៅក្បែរនោះ ហើយបណ្តាលឱ្យស្លឹកប្រែជាខ្លោចភ្លាមៗ។
វិធីសាស្រ្តកែតម្រូវ និងបង្ការ
ដើម្បីជៀសវាងបញ្ហានេះ កសិករគួរអនុវត្តវិធីសាស្រ្តមួយចំនួននេះ មុននឹងយកលាមកមាន់មកធ្វើជាជី។
យកលាមកមាន់ធ្វើជាជីកំប៉ុស្ត។ យើងត្រូវតែយកលាមកមាន់ទៅផ្អាប់ ឬធ្វើជាជីកំប៉ុស្តឱ្យបានរលួយអស់រយៈពេលយ៉ាងតិច ៣ ទៅ ៦ ខែ មុនពេលប្រើ។ ការផ្អាប់នេះជួយកាត់បន្ថយកំហាប់អាសូត និងសម្លាប់មេរោគ និងគ្រាប់ស្មៅ។
ក្រៅពីនេះកុំប្រើលាមកមាន់ស្រស់លើដំណាំ។ កុំដាក់លាមកមាន់ស្រស់ៗក្បែរគល់ដំណាំ ឬលាយជាមួយដីដាំភ្លាមៗ។ បន្ថែមពីនេះ យើងត្រូវប្រើបរិមាណតិចតួច។ ទោះជាទម្រង់ជីកំប៉ុស្តលាមកមាន់ក៏ដោយ ក៏គួរប្រើក្នុងបរិមាណតិចតួចបំផុត ព្រោះវាមានកំហាប់សារធាតុចិញ្ចឹមខ្លាំងជាងលាមកសត្វដទៃ។
បន្ថែមពីនេះគួរដាក់ជីលាមកមាន់ឱ្យឆ្ងាយពីឫសដំណាំ។ បើសិនជាត្រូវប្រើលាមកមាន់ស្រស់ ត្រូវបាចវាឱ្យឆ្ងាយពីតំបន់ឫស ហើយកប់វាចូលក្នុងដីជ្រៅៗ យ៉ាងហោចណាស់ ៦ សប្តាហ៍មុនដាំដំណាំ។
បងប្អូនណាខ្លះនិយប្រើជីលាមកមាន់ ហើយបានផលម៉េចដែរ?
ប្រភព៖ College of Agriculture