ជំងឺឈាមខ្មៅជាជំងឺឆ្លងរាតត្បាតមួយប្រភេទបង្កឡើងដោយបាក់តេរី ឈ្មោះ «បាក់ស៊ីឡុស អង់ត្រាក់ស៊ីស»។ គោដែលឆ្លងជមងឺនេះអាចងាប់ភ្លាមៗ ក្នុរយៈពេលពី ២-៣ម៉ោង។ បន្ទាប់ពីងាប់ដងខ្លួនសត្វមានសភាពទន់ ហូរឈាមតាមមាត់ និងរន្ធគូទ។
សត្វកើតជំងឺឈាមខ្មៅតាមរយៈការចម្លងមេរោគ ពីបាក់តេរីដែលរស់នៅក្នុងដី។ នៅពេលដែលមានគោងាប់ដោយជំងឺឈាមខ្មៅ គោផ្សេងទៀតដែលស៊ីស្មៅក្នុងវាលតែមួយ អាចប្រឈមនឹងការឆ្លងជំងឺនេះដែរ។
អាការៈកើតជំងឺមួយនេះ ក្នុងករណីមិនស្រួចស្រាល់ សត្វអាចចុះខ្សោយខ្លាំង មានកម្ដៅរហូតដល់ ៤១,៥ អង្សាសេ ពិបាកដកដង្ហើម មានឈាមក្នុងទឹកនោម ទឹកដោះ និងលាមក និងអាចសន្លប់។
ការព្យាបាល
សម្រាប់ការព្យាបាល ប្រសិនបើសត្វចាប់ផ្តើមឈឺ ត្រូវតែធ្វើការព្យាបាល ភ្លាមៗ ដោយប្រើពពួកអង់ទីប៊ីយ៉ូទិក ដែលស្ថិតក្រោមការវាយតម្លៃរបស់គ្រូពេទ្យសត្វ។
ការចាក់វ៉ាក់សាំង
ការការពារដ៏ល្អគឺការចាក់វ៉ាក់សាំងការពារជំងឺឈាមខ្មៅ។ វ៉ាក់សាំងបង្ការជាវិធានការមួយដ៏មានប្រសិទ្ធភាព។ ក្នុងមួយឆ្នាំត្រូវចាក់វ៉ាក់សាំងការពារជំងឺឈាមខ្មៅម្តង ដោយចាក់មុនរដូវភ្លៀងធ្លាក់។
គួរបញ្ជាក់ថា ជំងឺរាតត្បាតទៅលើសត្វគោ មិនមែនមានតែជំងឺឈាមខ្មៅតែមួយនោះគឺមានរហូតបួនប្រភេទសំខាន់ៗ គឺជំងឺឈាមខ្មៅ ជំងឺបូសខ្យល់ ជំងឺសារទឹក និងជំងឺអ៊ុតក្ដាម។ បងប្អូនមានបទពិសោធជាមួយជំងឺនេះ និងចង់ចែករំលែកចំណេះដឹង អាចទាក់ទងកសិ/Kakse។
ប្រភព៖ ឯកសារក្រសួងកសិកម្ម