វិស័យកសិកម្ម មានការរីកចម្រើនឡើងជារៀងរាល់ឆ្នាំ ដូចនេះហើយផលិតកម្មសត្វក៏បានដើរតួយ៉ាងសំខាន់មួយក្នុងការផ្គត់ផ្គង់ស្បៀងអាហារដែលផ្ដល់នូវសារជាតិចិញ្ចឹមខ្ពស់ និងជាប្រភពថវិកាមួយដ៏សំខាន់ក្នុងការរួមចំណែកលើកស្ទួយជីវភាពរស់នៅរបស់ប្រជាកសិករ។ មិនតែប៉ុណ្ណោះ ការចិញ្ចឹម សត្វគោ-ក្របី ក៏ជាផ្នែកមួយដ៏សំខាន់ក្នុងប្រព័ន្ធកសិកម្មនៅក្នុងប្រទេសកម្ពុជា។ ជាទូទៅ កសិករ ចិញ្ចឹមគោ-ក្របី ជា លក្ខណៈគ្រួសារហើយត្រូវបានយកទៅប្រើប្រាស់ជាកម្លាំងអូសទាញបើទោះជាមានគ្រឿងយន្តមកជំនួស។ ជាងនេះទៅទៀត គោ ក្របីជាប្រភពចំណូលមួយដ៏សំខាន់ប្រចាំគ្រួសារផងដែរ។
បច្ចុប្បន្ននេះ ការចិញ្ចឹមគោក្របីរបស់កសិករជួបប្រទះនូវបញ្ហាជាច្រើនដែលអាចរាំងស្ទះដល់ដំណើរការផលិតកម្ម។ កត្ដាជាច្រើន បានជំរុញឲ្យការចិញ្ចឹមគោក្របីអាចទទួលបានជោគជ័យមានដូចជា ការថែទាំ និងអនាម័យ ការជ្រើសរើសពូជ និងការបង្កាត់ពូជ ចំណីអាហារ និងវិធានការការពារជំងឺជាដើម។
១. ជម្រក ឬរោងគោ
ជម្រក ឬរោងគោមានសារៈសំខាន់ណាស់សម្រាប់ការពារទប់ទល់ជាមួយកម្ដៅព្រះអាទិត្យ ទឹកភ្លៀង និង កត្ដាចង្រៃផ្សេងៗទៀត។ ទីតាំងក្រោលគោត្រូវស្ថិតនៅលើដី ទីទួលមិនលិចទឹក ឬគ្មានទឹកហូរកាត់ ហើយបាតគ្រោលត្រូវស្ងួតជានិច្ច។ ក្រោលគួរ ស្ថិតនៅក្រោមទិសខ្យល់បៀបនឹងផ្ទះរស់នៅដើម្បីកុំឲ្យជះក្លិនមិនល្អចូលលំនៅឋាន។ កសិករមិនគួរចិញ្ចឹមគោក្រោមផ្ទះនោះទេ ព្រោះវាជះក្លិនមិនល្អ និងប៉ះពាល់សុខភាពម្ចាស់ផ្ទះ ងាយមានជំងឺដំកាត់ផ្សេងៗ។ ម្ចាស់ត្រូវបោសសំអាត កើបលាមកចេញ ពីក្រោលជា រៀងរាល់ថ្ងៃ។ ម្យ៉ាងទៀតគួរតែមានកន្លែង សម្រាប់ដាក់លាមកសត្វឲ្យបានត្រឹមត្រូវទុកសម្រាប់ធ្វើជី និងត្រូវសង់ឲ្យឆ្ងាយពីទ្រុង។
២. ស្នូកចំណី និងទឹក
ក្នុងក្រោលត្រូវដាក់ស្នូកចំណីនៅតាមបណ្ដោយក្រោលដើម្បីគោងាយស្រួលស៊ី និងមិនខ្ជះខ្ជាយចំណីចោល។ យើងអាចដាក់ទឹកក្នុងធុងប៉េត្រូសម្រាប់គោផឹកនិងត្រូវដាក់ធុងទឹកឲ្យបានច្រើន និងមានទឹកគ្រប់គ្រាន់តាមចំនួនគោ។
៣. ការជ្រើសរើសពូជគោ
ពូជគោមានសារសំខាន់សម្រាប់ផលិតកម្មគោ។ កាលណាកសិកររើសពូជចិញ្ចឹមត្រឹមត្រូវ ទិន្នផល ក៏តាមនោះដែរ។ ការជ្រើសរើសបាគោត្រូវមាន រូបរាងស្អាត មាឌធំ ជើងរឹងមាំ ក្រចកល្អ ពងស្វាសធំ ឬមានទំហំប្រហាក់ប្រហែល មានសុខភាពល្អ និងមិនធ្លាប់កើតជំងឺឆ្លងផ្សេងៗ ជាពិសេសជំងឺផ្លូវបន្តពូជ។ ការជ្រើសគោមេ ត្រូវមានរូបរាងស្អាត ក្បាលរាងងើប បន្តិច មានកន្សោមដោះធំល្អ ចុងដោះស្មើគ្នាទាំងបួន សុខភាពល្អ និងមិនធ្លាប់កើតជំងឺឆ្លង ជាពិសេសជំងឺផ្លូវបន្តពូជ ឬមានប្រវត្តិរលូតកូន៕
បងប្អូនអ្នកមានបទពិសោធចិញ្ចឹមគោ មានអ្វីចង់ចែករំលែក កុំភ្លេចទាក់ទងមកកសិ/Kakse ណា។
ចែករំលែកដោយ៖ រក្សា
ប្រភព៖ ឯកសារក្រសួងកសិកម្ម