បន្លែសុវត្ថិភាព គឺជាប្រភេទបន្លែដែលប្រជាកសិករដាំដុះជាទ្រង់ទ្រាយធំឬតូចទៅតាមទំហំដី។ ការដាំដុះនោះមានការប្រើប្រាស់ ថ្នាំបាញ់សម្លាប់សត្វល្អិតផ្សេងៗ តែធ្វើឡើងតាមលក្ខណៈបច្ចេកទេសត្រឹមត្រូវស្ដង់ដានៃការណែនាំច្បាស់លាស់។ ម្យ៉ាងទៀត កសិករដាំបន្លែសុវត្ថិភាព ទទួលបានការបណ្ដុះបណ្ដាលត្រឹមត្រូវពីអ្នកជំនាញកសិកម្ម។ ចំពោះបន្លែដែលទទួលស្គាល់ថាជា បន្លែមានសុវត្ថិភាព លុះត្រាតែបានទទួលវិញ្ញាបនប័ត្របញ្ជាក់ ជាប្រភេទបន្លែបានអនុវត្តកសិកម្មល្អ ឬហៅកាត់ថា (GAP) ពី ក្រសួងកសិកម្មរក្ខាប្រមាញ់ និងនេសាទ។
នៅក្នុងប្រទេកម្ពុជាយើង គេបានចាត់ថ្នាក់បន្លែជា ៤ប្រភេទ គឺបន្លែធម្មជាតិ បន្លែសុវត្ថិភាព បន្លែសរីរាង្គ និងបន្លែគីមី ប៉ុន្ដែជាទូទៅអ្នកនៅភ្នំពេញនិយមហៅតែពីរប្រភេទទេ គឺបន្លែធម្មជាតិ និងបន្លែគីមី។
តើបន្លែទាំង៤ប្រភេទខាងលើមានន័យខុសគ្នាដូចម្ដេច?
១. បន្លែធម្មជាតិ៖ បន្លែងធម្មជាតិគឺជាបន្លែដែលកសិករនិយមដាំជាលក្ខណៈគ្រួសារ ឬជាអាជីវកម្មក្ដី ប៉ុន្ដែ មិនប្រើប្រាស់សារធាតុគីមីនោះឡើយ។ បើទោះបីមានសត្វចង្រៃស៊ីបន្លែក្ដី ក៏ពួកគាត់តែងតែផ្សំថ្នាំបែបធម្មជាតិ ដែលមាននៅជុំវិញផ្ទះរបស់គាត់តែប៉ុណ្ណោះ។
២. បន្លែសុវត្ថិភាព៖ បន្លែសុវត្ថិភាពគឺជាការដាំដុំជាលក្ខណៈទ្រង់ទ្រាយធំ ទៅតាមទំហំដីរបស់ពួកគាត់។ ប៉ុន្ដែការដាំដុះនេះក៏ មានការប្រើប្រាស់ថ្នាំគីមី ដើម្បីបាញ់សម្លាប់សត្វល្អិតផ្សេងៗ តែធ្វើឡើងតាមលក្ខណៈបច្ចេកទេសត្រឹមត្រូវស្ដង់ដារ នៃការណែនាំច្បាស់លាស់ ហើយកសិករដាំបន្លែសុវត្ថិភាព បានទទួល ការបណ្ដុះបណ្ដាលត្រឹមត្រូវពីអ្នកជំនាញកសិកម្ម។
៣. បន្លែសរីរាង្គ៖ បន្លែប្រភេទនេះ គឺមានការប្រយ័ត្នប្រយែងខ្ពស់លើគុណភាពនៃការដាំដុះ រាប់តាំងពីការជ្រើសរើសដីឡើងទៅ។ នៅត្រង់នេះមានន័យថា ក្រៅពីមិនប្រើប្រាស់ថ្នាំគីមីលើបន្លែ គឺកសិករត្រូវសិក្សាអំពីប្រវត្តិដីរបស់ខ្លួនឲ្យប្រាកដថា ដីមិនធ្លាប់ ប្រើប្រាស់ថ្នាំគីមី ឬទទួលឥទ្ធិពលគីមីពីមុនមក។
៤. បន្លែគីមី៖ បន្លែគីមីជាប្រភេទបន្លែដែលកសិករប្រើប្រាស់គីមីគ្មានក្បួនខ្នាតត្រឹមត្រូវនោះទេ ហើយភាគច្រើនប្រើប្រាស់ថ្នាំពុលកសិកម្មមិនត្រឹមត្រូវតាមការណែនាំថែមទៀត។ បន្លែប្រភេទនេះត្រូវបានប្រជាពលរដ្ឋកម្ពុជាកំពុងមានការព្រួយបារម្ភខ្លាំង ដែលមានវត្តមាននៅលើទីផ្សារ។
ការជ្រើសរើសការដាំដុះបន្លែសុវត្ថិភាព គឺជាជម្រើសដ៏ល្អមួយសម្រាប់កសិករ ព្រោះមាន មានសុវត្ថិភាពខ្ពស់ទាំងសុខភាពអ្នកដាំ និងអ្នកទទួលទាន។ សម្រាប់អ្នកដែលចង់ស្វែងរកបញ្ជីឈ្មោះកសិករ សហគមន៍ និងក្រុមហ៊ុនផ្គត់ផ្គង់បន្លែសុវត្ថិភាព សូមចុចនៅលើតំណភ្ជាប់នេះ «បញ្ជីឈ្មោះកសិករ សហគមន៍ និងក្រុមហ៊ុន ផ្គត់ផ្គង់បន្លែសុវត្ថិភាព»។
ចែករំលែកដោយ៖ រក្សា