ជំងឺបូសខ្យល់គឺជាជំងឺឆ្លងម្យ៉ាងទៅលើសត្វគោ បង្កឡើងដោយបាក់តេរីឈ្មោះ ក្លូស្រ្តីដ្យូម សូវី។ ជំងឺនេះច្រើនកើតឡើងលើគោដែលមានអាយុពី ៦-២៤ខែ ។
ជំងឺបូសខ្យល់អាចឱ្យសត្វងាប់ក្នុងរយៈពេលពី ១២-២៤ម៉ោង ដោយមិនបញ្ចេញរោគសញ្ញាអ្វីទាំងអស់ ។
ជាទូទៅគេឃើញគោងាប់ដោយពុំមានឃើញអាការៈឈឺឡើយ ហើយក៏មិនចម្លងពីសត្វមួយទៅសត្វមួយទៀតដែរ លុះត្រាតែសត្វដែលពុំមានជំងឺទៅស៊ីស្មៅខ្ចីកៀកនឹងដីដែលមានមេរោគទើបអាចឈឺបាន ។
អការៈនៃសត្វគោកើតបូសខ្យល់គឺ ករណីមិនស្រួចស្រាល់ សត្វមិនចង់ដើរ ដោយសារឈឺជើង ។ នៅសាច់ដុំត្រគៀក ស្មា ឬ ក មានហើម និង ឮសូរសំឡេងខ្យល់ ។ ពេលចាប់ផ្តើមឆ្លងជំងឺដំបូង កន្លែងហើម មានទំហំតូច ក្តៅ និងឈឺចាប់ខ្លាំង ។ ដោយសារជំងឺបូខ្យល់វិវត្តលឿន ធ្វើឱ្យកន្លែងហើមរីកធំឡើង ហើយពេលស្ទាបឮសូរសំឡេងប្រិបៗ ។
ការព្យាបាលជំងឺបូសខ្យល់
សម្រាប់ការព្យាបាលពេលដែលដឹងថាសត្វឈឺត្រូវចាក់ប៉េនីស៊ីលីន ឬអាម៉ុកស៊ីលីន ដោយចាក់សាច់ដុំ និងចាក់នៅជុំវិញ កន្លែងដែលហើមក្នុងសាច់ដុំ។ ការព្យាបាលត្រូវធ្វើឡើងដោយពេទ្យសត្វជំនាញ។
ការចាក់វ៉ាក់សាំងបង្ការជំងឺបូសខ្យល់
សម្រាប់ការការពារគឺការចាក់វ៉ាក់សាំង ដែលចាក់ទៅមានប្រសិទ្ធភាព គឺវ៉ាក់ សាំង ៧មុខ ដែលអាចប្រឆាំងបានគ្រប់ក្លូស្រីដ្យូម ។
ពេលវេលាការចាក់វ៉ាក់សាំងជំងឺបូសខ្យល់
- លើកទី ១ ពេលដែលកូនគោអាយុ ២ខែ
- លើកទី ២ ធ្វើឡើង ១ខែ ក្រោយលើកទី ១
- លើកទី ៣ ធ្វើឡើង ១ឆ្នាំ ក្រោយលើកទី ២
- ចាក់រំឭករៀងរាល់៥ឆ្នាំម្ដង។
គួរបញ្ជាក់ផងដែរថា ជំងឺរាតត្បាតទៅលើសត្វគោនេះមិនមែនមានតែជំងឺបូសខ្យល់តែមួយនោះគឺសរុបមានជំងឺបួនប្រភេទសំខាន់ៗគឺជំងឺឈាមខ្មៅ ជំងឺបូសខ្យល់ ជំងឺសារទឹក និងជំងឺអ៊ុតក្ដាម៕
ប្រភព៖ ឯកសារក្រសួងកសិកម្ម