ក្នុងការចិញ្ចឹមគោក្របីនិងពពែក្រៅពីពពួកស្មៅលេហ្គីម និងស្មៅធញ្ញជាតិ ពោតគឺជាដំណាំបៃតងមួយប្រភេទដែលផ្ដល់ទាំងដើមនិងផ្លែអាចធ្វើជាចំណីសត្វបានយ៉ាងល្អប្រសើរ និងជួយដល់ការលូតលាស់របស់សត្វទំពាអៀង ដូចជាគោ ជាដើម។។ នៅក្នុងកសិដ្ឋានធំៗពិសេសកសិដ្ឋានចិញ្ចឹមគោទឹកដោះគេនិយមជ្រើសរើសដាំដំណាំពោតធ្វើជាចំណីសត្វណាស់ដោយសារវាសារជាតិចិញ្ចឹមច្រើន និងគុណភាពខ្ពស់ព្រមទាំងងាយផ្អាប់ទុកជាចំណីបានពេញមួយឆ្នាំ។
តាមពិតទៅពោតគឺជាប្រភេទដំណាំដែលមានប្រូតេអ៊ីនពី៨-៩% និងជាប្រភេទចំណីផ្ដល់ថាមពលខ្ពស់ដ៏មានសារៈសំខាន់ក្នុងការចិញ្ចឹមសត្វ ហើយភាគច្រើនត្រូវបានគេផ្ដល់ឲ្យសត្វស៊ីក្នុងទម្រង់ផ្អាប់ដោយគេត្រូវប្រមូលផលវាទាំងដើម ហើយកមកកែច្នៃផ្អាប់ទុកជាចំណីសត្វនៅពេលត្រូវការ។
តើផ្អកដំណាំពោតគឺជាអ្វី?
ផ្អកដំណាំពោត ឬនិយាយភាសាងាយផ្អកពោតគឺជាការប្រមូលផលដំណាំពោតមកកាត់ជាកំណាត់ល្អិតៗហើយរក្សាទុកកន្លែងគ្មានខ្យល់ដូចជាក្នុងធុង ឬថង់ផ្លាស្ទិកបិទជិត។ ការកែច្នៃរក្សាទុកដើមពោតចិញ្ច្រាំក្នុងកន្លែងគ្មានខ្យល់បែបនេះ គឺដើម្បីឲ្យបាត់តេរីអាចបំបែកសមាសធាតុគីមីក្នុងចំណីបានធ្វើល្បើង ឬក៏កាច់និងក្លាយជាចំណីផ្អាប់ដ៏មានគុណភាព។
ការធ្វើផ្អកពោតផ្ដល់នូវអត្ថប្រយោជន៍ដូចជាបង្កើនរសជាតិ និងសារធាតុចិញ្ចឹមជួយឲ្យគោ ក្របី ពពែ លូតលាស់បានលឿន និងក៏អាចរក្សាទុកបានយូរខែឆ្នាំ សម្រាប់ជាចំណីស្តុកនៅកំឡុងពេលខ្សត់ចំណីក្នុងរដូវប្រាំង។ កសិករអាចកំណត់ពេលប្រមូលផលបាននូវដំណាក់កាលដែលដំណាំពោតមានគុណភាពល្អបំផុតសម្រាប់ធ្វើផ្អក និងអាចកាត់បន្ថយការធ្លាក់ចុះគុណភាពដោយសារការទុកដំណាំចាស់ដើមពេក។
របៀបធ្វើរបៀបធ្វើផ្អកដំណាំពោតជាលក្ខណៈគ្រួសារគឺប្រហាក់ប្រហែល ឬស្ទើរតែដូចគ្នាទៅនឹងការធ្វើផ្អកស្មៅដែរដោយគេអាចធ្វើបានយ៉ាងងាយតាមរបៀបសាមញ្ញមួយ។
១. សម្ភារៈ
– ដើមពោតបន្ទាប់ពីប្រមូលផលហើយ ឬក៏ដើមពោតដែលបងប្អូនដាំសម្រាប់ធ្វើជាចំណីសត្វ
– មេផ្អកដែលបានធ្វើទុក ឬអ៊ីអឹមដែលបងប្អូនអាចរកទិញបានពីផ្សារ
– ថង់ប្លាសិ្ទកក្រាស់
– សំបកបាវ
– ខ្សែសម្រាប់ចងមាត់ថង់
– កំបិតសំរាប់កាត់ដើមពោត ឬស្លឹកជាកង់ៗ ឬម៉ាស៊ីនចិញ្ច្រាំ
– តង់សំរាប់ក្រាលដាក់ដើមពោត ដែលបានកាត់ឬចិញ្ច្រាំរួច
២. របៀបធ្វើ
– យកដើមពោតដែលបានកាត់ ឬចិញ្ច្រាំរួចហើយដាក់ចូលទៅក្នុងថង់ប្លាសិ្ទក ញាត់វាអោយបានណែនល្អ
– ជាទូទៅថង់ប្លាសិ្ទកមួយអាចដាក់ផ្អកដើមពោតបានចន្លោះពី ២៥ទៅ៣០ គីឡូក្រាម
– ចាក់មេផ្អក ឬអ៊ីអឹមចំនួន៣គម្របដបចូលទៅក្នុងបាវ ដែលបានច្រករួច
– ចងមាត់ថង់ឲ្យបានតឹង ដោយធ្វើយ៉ាងណាមិនត្រូវឲ្យមានខ្យល់នៅក្នុងបាវ
– លើកបាវដែលបានធ្វើរួចហើយយកទៅដាក់ក្នុងម្លប់
– រក្សាទុកដោយបិទជិតមិនមានខ្យល់ចេញចូល
– រក្សាផ្អកដើមពោតស្រស់ក្នុងថង់នោះរហូតដល១០ថ្ងៃឡើង ទើបអាចឲ្យគោក្របីស៊ីបាន
– ត្រូវរក្សាទុកនៅក្នុងម្លប់និងជៀសវាងកុំឲ្យមានការបែកធ្លាយថង់។
ការធ្វើលក្ខណៈទ្រង់ទ្រាយតូច
គេអាចប្រើស្មៅ ១០០ គីឡូក្រាម ទឹក ៥ លីត្រលាយជាមួយស្កររងូ ៥ គីឡូក្រាម ហើយយកមកស្រោចស្រពលើស្មៅ ឬពោតដែលបានហាន់រួចនិងហាលស្រពាប់បន្តិច។ រួចដាក់ចូលក្នុងថង់ប្លាស្ទិកឬវត្ថុដែលបិទជិតមិនឲ្យខ្យល់ចូលរយៈពេល ៣ ទៅ ៤ សប្តាហ៍ទើបយកឲ្យសត្វស៊ីបាន ហើយបន្ទាប់ពីបើកធុង ឬថង់ដែលដាក់ផ្អកពោតឲ្យគោស៊ីរួច ពោតដែលនៅសល់គួរតែដាក់ឲ្យគោស៊ីឲ្យឆាប់អស់មិនគួរទុកយូរពេកទេ។
ផ្អកដែលធ្វើហើយអាចទុករយះពេលយូរបានរហូតដល់៣ឆ្នាំ
-គោក្របីមួយក្បាលត្រូវការចំណីពី ២៥ ទៅ ៥០ គីឡូក្រាមក្នុងមួយថ្ងៃ
-បងប្អូនអាចឲ្យស៊ីផ្អកសុទ្ឋ ឬលាយជាមួយចំបើង ឬក៏អ្វីផ្សេងដែលបងប្អូនធ្លាប់អោយគោស៊ីក៏បាន៕
បងប្អូនណាខ្លះធ្លាប់ធ្វើផ្អកដើមពោតសម្រាប់គោ ក្របី? ចង់ចែករំលែកបទពិសោធ កុំភ្លេចទាក់ទងមកកសិ/Kakse។
ចែករំលែកដោយ៖ ឡឹក គឹមសួរ
ប្រភព៖ ARDB, ឯកសារក្រសួងកសិកម្ម
អត្ថបទគួរអាន៖
១. វិធីថែទាំគោនៅរដូវប្រាំ និងរដូវវស្សា
២. ធ្លាប់គិតពីគុណភាពទឹកទេពេលឲ្យគោផឹកម្ដងៗ?