ការទទួលបានទិន្នផលខ្ពស់មិនមែនអាស្រ័យតែលើការថែទាំធម្មតានោះទេ ប៉ុន្តែវាកើតចេញពីការផ្តល់តុល្យភាពសារធាតុចិញ្ចឹមដល់ដំណាំ។ ដំណាំត្រូវការសារធាតុចិញ្ចឹមខុសៗគ្នាដើម្បីលូតលាស់ និងបង្កើតផល។ យើងអាចបែងចែកសារធាតុទាំងនោះជា ៣ ក្រុមធំៗ។
១. សារធាតុចិញ្ចឹមមូលដ្ឋានបានពីបរិស្ថាន
នេះជាអ្វីដែលដំណាំទទួលបានដោយធម្មជាតិពីបរិស្ថាន៖
- កាបូន៖ ជួយកសាងជាលិកាដំណាំតាមរយៈការធ្វើរស្មីសំយោគ។
- អ៊ីដ្រូសែន៖ បានមកពីទឹក និងដើរតួនាទីក្នុងសកម្មភាពមេតាបូលីស។
- អុកស៊ីសែន៖ ចាំបាច់សម្រាប់ការដកដង្ហើម និងការផលិតថាមពលរបស់ដំណាំ។
២. ម៉ាក្រូសារធាតុចិញ្ចឹម
នេះគឺជាសារធាតុចិញ្ចឹមចម្បងដែលដំណាំត្រូវការច្រើនដើម្បីលូតលាស់ខ្លាំង៖
- អាសូត៖ ជំរុញការលូតលាស់ស្លឹក និងការផលិតក្លរ៉ូហ្វីល។ កង្វះអាសូតធ្វើឱ្យស្លឹកចាស់ឡើងពណ៌លឿង។
- ផូស្វ័រ៖ ជួយដល់ការលូតលាស់ឫស និងការចេញផ្កាផ្លែ។ កង្វះផូស្វ័រធ្វើឱ្យដំណាំមិនលូតលាស់ និងស្លឹកមានពណ៌ស្វាយ។
- ប៉ូតាស្យូម៖ បង្កើនភាពធន់នឹងជំងឺ និងជួយគ្រប់គ្រងទឹកក្នុងដំណាំ។ កង្វះប៉ូតាស្យូមធ្វើឱ្យគែមស្លឹកក្រៀម និងដើមទន់ខ្សោយ។
- កាល់ស្យូម៖ ពង្រឹងជញ្ជាំងកោសិកា និងការលូតលាស់ឫស។
- ម៉ាញ៉េស្យូម៖ ជាសមាសធាតុសំខាន់នៃក្លរ៉ូហ្វីល និងជួយដល់ការធ្វើរស្មីសំយោគ។
- ស្ពាន់ធ័រ៖ សំខាន់សម្រាប់ការផលិតប្រូតេអ៊ីន និងគុណភាពផលិតផល។
៣. មីក្រូសារធាតុចិញ្ចឹម
ទោះបីត្រូវការតិចមែន ប៉ុន្តែមីក្រូធាតុមានសារៈសំខាន់ខ្លាំងចំពោះសុខភាពដំណាំ៖
- ដែក៖ សម្រាប់ការបង្កើតក្លរ៉ូហ្វីល។
- ម៉ង់ហ្គាណែស៖ ជួយការធ្វើរស្មីសំយោគ។
- ស័ង្កសី៖ សំខាន់សម្រាប់អរម៉ូនលូតលាស់។
- ទង់ដែង៖ ជួយដល់ការបន្តពូជ។
- បូរ៉ុន៖ សំខាន់សម្រាប់ការចេញផ្កា និងការលំអង។
- ម៉ូលីបដែន៖ ជួយដល់ការប្រើប្រាស់អាសូត។
- ក្លរួ៖ ជួយគ្រប់គ្រងតុល្យភាពទឹក។
ការជ្រើសរើសប្រភេទជី
- ជីគីមី៖ ផ្តល់សារធាតុចិញ្ចឹមបានរហ័ស ងាយស្រួលកែតម្រូវការខ្វះខាតភ្លាមៗ។
- ជីសរីរាង្គ៖ មកពីលាមកសត្វ ជីកំប៉ុស្ត ឬកាកសំណល់រុក្ខជាតិ ដែលជួយកែលម្អដី និងផ្តល់ជីយូរអង្វែង។
- ការគ្រប់គ្រងជីចម្រុះ៖ ប្រព័ន្ធកសិកម្មដែលមានផលិតភាពខ្ពស់បំផុត គឺការផ្សំរវាងការប្រើជីគីមី និងជីសរីរាង្គចូលគ្នា។
ឫសដំណាំស្រូបយកជីតាមរយៈដំណោះស្រាយដី ដូច្នេះសំណើមដី និងប្រព័ន្ធឫសដ៏រឹងមាំគឺមានសារៈសំខាន់បំផុត។ ការលើស ឬខ្វះសូម្បីតែសារធាតុចិញ្ចឹមមួយមុខ ក៏អាចរារាំងការលូតលាស់ និងកាត់បន្ថយទិន្នផលដែរ។ ដូច្នេះ ការពិនិត្យដីជាប្រចាំ និងការផ្តល់ជីឱ្យមានតុល្យភាព គឺជាគន្លឹះនៃភាពជោគជ័យ និងនិរន្តរភាពក្នុងការធ្វើកសិកម្ម៕
ដោយ៖ ចាន់ តារា
ប្រភព៖ Gulab Orchard /CropNut