កសិករដាំពោតជាច្រើនបានទិញជីល្អ ពូជល្អ និងរៀបចំដីបានល្អ ប៉ុន្តែទិន្នផលនៅតែទាប។ ហេតុអ្វី? បញ្ហាជាធម្មតាមិនមែនស្ថិតនៅលើជីនោះទេ ប៉ុន្តែគឺស្ថិតនៅលើពេលវេលានៃការដាក់ជី។ ដំណាំពោតជាដំណាំដែលលូតលាស់លឿន ហើយដំណាក់កាលលូតលាស់នីមួយៗ តម្រូវការជីវជាតិជាក់លាក់។ បើដាក់ជីឆាប់ពេក ឬយឺតពេក ជីទាំងនោះនឹងត្រូវបាត់បង់ ហូរច្រោះចោល ឬត្រូវស្មៅស៊ីអស់ភាគច្រើនមិនខាន។
ការដាក់ជីត្រូវពេលវេលាអាចបង្កើនទិន្នផលពោតពី២០% ទៅ ៥០% ដោយមិនចាំបាច់បន្ថែមបរិមាណជីឡើយ។
ហេតុអ្វីពេលវេលាដាក់ជីសំខាន់?
ដំណាំពោតលូតលាស់តាមដំណាក់កាលច្បាស់លាស់។ ដំណាក់កាលនីមួយៗទាមទារជីវជាតិផ្សេងៗគ្នា៖
- ដំណុះ និងការលូតលាស់ដំបូង ត្រូវការ ផូស្វ័រ (Phosphorus)។
- ការលូតលាស់ស្លឹក និងដើម ត្រូវការ អាសូត (Nitrogen)។
- ការកកើតផ្លែ ត្រូវការទាំង អាសូត និងប៉ូតាស្យូម (Potassium)។
បើជីវជាតិទាំងនោះមិនមាននៅពេលត្រឹមត្រូវទេ ដំណាំនឹងតឿ ក្រិម លឿងស្លឹក និងបង្កើតផ្លែតូចៗ។
ដំណាក់កាលគន្លឹះនៃការដាក់ជី
ដំណាក់កាលទី ១៖ ដាំដុះ (០-២ សប្តាហ៍)
- គោលបំណង៖ ត្រូវការផូស្វ័រសម្រាប់ការលូតលាស់ឫសរឹងមាំ។
- របៀបដាក់: ដាក់ ជីបំប៉នគល់ ដូចជាជី NPK ឬ ជីសមាសនៅពេលដាំ។
- មូលហេតុ: ផូស្វ័រមិនសូវធ្វើចលនាក្នុងដីទេ ដូច្នេះត្រូវដាក់វាឲ្យនៅកៀកនឹងឫស។
ដំណាក់កាលទី ២៖ លូតលាស់ដើម/ស្លឹក (៣-៦ សប្តាហ៍)
- គោលបំណង: នេះគឺជាដំណាក់កាលសំខាន់បំផុតសម្រាប់ អាសូត។
- របៀបដាក់: ដាក់ជីបំប៉នលើកទី ១ នៅពេលពោតមានកម្ពស់ត្រឹមជង្គង់។
- ផលប៉ះពាល់នៃការយឺតយ៉ាវ: បើពន្យារពេលដាក់ជី ដំណាំពោតនឹងបាត់បង់ទិន្នផលសក្តានុពល ៣០% ទៅ ៤០%។
ដំណាក់កាលទី ៣៖ មុនចេញផ្កាឈ្មោល (៦-៨ សប្តាហ៍)
- គោលបំណង: ពោតកំពុងបង្កើតផ្លែនៅខាងក្នុងដើម។
- របៀបដាក់: ជំរុញដោយដាក់ ជីអាសូតបំប៉នស្រាលៗលើកទី ២។
- លទ្ធផល: ជួយផលិតផ្លែវែង គ្រាប់ច្រើន និងពេញគ្រាប់ល្អ។ ដំណាក់កាលនេះសម្រេចទំហំផ្លែចុងក្រោយ។
ដំណាក់កាលទី ៤៖ បំពេញគ្រាប់ (៨ សប្តាហ៍ឡើងទៅ)
- គោលបំណង: ពោតត្រូវការ ប៉ូតាស្យូម និងជីវជាតិដែលផ្ទុកទុក។
- ចំណាំ: ការដាក់ជីអាសូត យឺតពេក នៅដំណាក់កាលនេះ គឺជារឿងឥតប្រយោជន៍ ព្រោះរុក្ខជាតិលែងស្រូបយកអាសូតបានច្រើនទៀតហើយ។
កំហុសទូទៅក្នុងការដាក់ជី
- ដាក់ជីទាំងអស់ក្នុងពេលតែមួយ។
- ដាក់ជីបំប៉នលើកទី ១ ឆាប់ពេក ឬយឺតពេក។
- ដាក់ជីនៅពេលដីស្ងួត។
- ពន្យារពេលដកស្មៅ រហូតដល់ជីត្រូវស្មៅស៊ីអស់។
- ប្រើជីបំប៉នគល់ក្រោយពេលដាំរួច។
កំហុសទាំងនេះធ្វើឲ្យប្រសិទ្ធភាពជីថយចុះ ហើយខ្ជះខ្ជាយថវិកា។
ជីមានប្រសិទ្ធភាពលុះត្រាតែបានដាក់នៅពេលវេលាត្រឹមត្រូវ។ ពេលវេលាត្រឹមត្រូវជួយបង្កើនការស្រូបយកជីវជាតិ សន្សំសំចៃជី និងបង្កើនទិន្នផលពោតដោយមិនចាំបាច់ចំណាយបន្ថែម។
នៅពេលយើងផ្តល់ចំណីដល់ពោតចំពេលដែលវាត្រូវការ ដំណាំនឹងផ្តល់ផលមកយើងវិញជាផ្លែធំ មាំមួន និងទិន្នផលខ្ពស់។
«ពេលវេលាត្រឹមត្រូវ គឺជាអាថ៌កំបាំងនៃទិន្នផលដ៏ត្រឹមត្រូវ។»
ដោយ៖ ទូច សុខា
ប្រភព៖ Pioneer