ការប្រើប្រាស់ឡជីវឧស្ម័នត្រូវគេរំពឹងថានឹងអាចជួយកាត់បន្ថយឧស្ម័នផ្ទះកញ្ចក់តាមរយៈការកាត់បន្ថយការបំភាយឧស្ម័នមេតានពីលាមកសត្វ ការផ្លាស់ប្តូរពីប្រើជីគីមី ដោយមកប្រើជីឡជីវឧស្ម័ន និងជីកំប៉ុស្តិ៍ផ្សំពីជីឡជីវឧស្ម័ន និងការកាត់បន្ថយការប្រើឥន្ធៈដើម្បីចម្អិនអាហារ។
ឡជីវឧស្ម័នត្រូវបានរចនាឡើងដោយសភាពរឹងមាំ ងាយស្រួលថែទាំ សម្ភារសាងសង់អាចរកបានក្នុងស្រុក ហើយតំបន់ដែលមានកម្ពស់ទឹកខ្ពស់ក៏អាចសាងសង់បាន និងមានការចំណាយតិច។
ក្នុងការសាងសង់ឡជីវឧស្ម័ននេះ អ្នកប្រើប្រាស់ចំណាយត្រឹមតែ៦០ម៉ឺនរៀលប៉ុណ្ណោះ និងអាចទទួលបានជីវឧស្ម័នសម្រាប់ដុតកម្ដៅកម្អិតម្ហូបអាហារបានយ៉ាយស្រួល និងមិនបានរម្ភពីការឡើងថ្លៃនៃតម្លៃហ្គាស។ ឡជីវឧស្ម័នក្រៅពីប្រើសម្រាប់ដាំស្ល ក៏អាចប្រើសម្រាប់ដុតបំភ្លឺនិងដំណើរការម៉ាស៊ីនផងដែរ។
មាឌរបស់ឡជីវឧស្ម័នមានផ្សេងៗគ្នាដែលតូចបំផុតទំហំបួនម៉ែតគុប និងធំបំផុតទំហំ១០ម៉ែត្រគុប និងអាចផលិតជីវឧស្ម័នបាន០,៨ម៉ែត្រគុបទៅ៤ម៉ែត្រគុបក្នុងមួយថ្ងៃ។
ក្នុងមួយម៉ែត្រគុបជីវឧស្ម័នអាចគ្រប់គ្រាន់សម្រាប់៖
- ជំនួសឧសបាន៤-៥គីឡូក្រាម
- ជំនួសប្រេងកាតបាន០,៦-០,៧លីត្រ
- ជំនួយសធ្យូងបាន១,៦គីឡូក្រាម
- ជំនួយហ្គាស (LPG) បាន ០,៤គីឡូក្រាម
- ដំណើរការចង្ក្រានចំហអេះបាន២ម៉ោងកន្លះ
- ដំណើរការចង្កៀងបាន៥-៨ម៉ោង
- បង្កើតអគ្គិសនីបាន ១,៦-១,៧គីឡូវ៉ាត់ម៉ោង
- ដំណើរការម៉ាស៊ីនស៊ីនកម្លាំង១សេះបាន២ម៉ោង។
ឡជីវឧស្ម័ននេះស្ថិតក្នុងគម្រោងខ្សែច្រវាក់ផលិតកម្មដោយភាតរៈបរិស្ថាន អនុវត្តដោយក្រសួងកសិកម្ម ដោយមានការគាំទ្រពីធនាគារអភិវឌ្ឍន៍អាស៊ី និងអង្គការ Green Climate Fund នៅក្នុងខេត្តចំនួនបួនរួមមានកំពង់ចាម ត្បូងឃ្មុំ តាកែវ និងកំពត។
គម្រោងនេះនឹងជំរុញភាពធន់នឹងអាកាសធាតុ នៃហេដ្ឋារចនាសម្ព័ន្ធកសិកម្មសំខាន់ៗ និងជួយសម្របសម្រួលការធ្វើពាណិជ្ជកម្មដំណាំស្រូវ ពោត ដំឡូងមី និងផលិតកម្ម ស្វាយ។ គម្រោងនឹងជួយបង្កើនផលិតភាព និងការធ្វើពិពិធកម្មដំណាំ ការធ្វើឱ្យប្រសើរឡើងនូវសមត្ថភាពសម្រាប់ស្តុកផលិតផល ដំណើរការការធ្វើតេស្តគុណភាព សុវត្ថិភាព ការលើកកម្ពស់ការប្រើប្រាស់ថាមពលពន្លឺព្រះអាទិត្យ និងថាមពល កកើតឡើងវិញតាមរយៈការសាងសង់ឡជីវឧស្ម័ន និងរោងជីកំប៉ុស្តិ៍ដល់អ្នកទទួលផល លើកកម្ពស់ការប្រើប្រាស់ ការគ្រប់គ្រង និងការស្តុកទុក ជីឡជីវឧស្ម័ន និងជីកំប៉ុស្តិ៍ផ្សំពីជីឡជីវឧស្ម័ន សម្រាប់ប្រើប្រាស់លើដំណាំ។
គម្រោងខ្សែច្រវាក់ផលិតកម្មដោយភាតរៈបរិស្ថាន នឹងសម្របសម្រួលសាងសង់ឡជីវឧស្ម័ន ចំនួន ១២.០០០ និងរោងជីកំប៉ុស្តិ៍ ចំនួន ៦.០០០ ចាប់ពីឆ្នាំ២០២០ ដល់ខែកញ្ញា ឆ្នាំ២០២៤៕
ដោយ៖ ចាន់ តារា