កសិករចិញ្ចឹមមាន់មួយចំនួនកំពុងចំណាយប្រាក់ច្រើនលើចំណីមាន់ថ្លៃៗ ប៉ុន្តែមិនទាន់ទទួលបានប្រាក់ចំណេញតាមអ្វីដែលបានរំពឹងទុក។ ប៉ុន្តែការពិតមានចំណីបែបធម្មជាតិដែលមានស្រាប់នៅជុំវិញផ្ទះយើង ក៏រួមចំណែកជួយកាត់បន្ថយការចំណាយលើចំណីផ្សារបានដែរ។ ចកបាយទា ឬចកអាសូឡា(Azolla) ជាចំណីមានសារជាតិចិញ្ចឹមច្រើនសម្រាប់មាន់។
ចកបាយទាជាអ្វី?
ចកបាយទា (Azolla) គឺជារុក្ខជាតិតូចៗដែលលូតលាស់លើផ្ទៃទឹក មានល្បឿនលូតលាស់លឿន និងសម្បូរទៅដោយសារធាតុចិញ្ចឹមសំខាន់ៗ ដូចជា៖
- ប្រូតេអ៊ីនខ្ពស់
- វីតាមីន
- សារធាតុរ៉ែ
សារធាតុទាំងនេះអាចជួយមាន់លូតលាស់បានល្អ ប្រសើរនិងមានសុខភាពរឹងមាំ។
អត្ថប្រយោជន៍សំខាន់ៗ
- កាត់បន្ថយការចំណាយលើចំណីមាន់
- ជួយបង្កើនការលូតលាស់ និងសុខភាពមាន់
- ជាធនធានធម្មជាតិ ងាយរក និងអាចបង្កើតបានដោយខ្លួនឯង
- កាត់បន្ថយការពឹងផ្អែកលើចំណីផ្សារថ្លៃៗ
វិធីប្រើប្រាស់ត្រឹមត្រូវ
ចកបាយទាមិនគួរផ្តល់ឲ្យមាន់ស៊ីដោយផ្ទាល់នោះទេ គួរលាយជាមួយចំណីប្រចាំថ្ងៃ ដើម្បីរក្សាតុល្យភាពសារធាតុចិញ្ចឹមក្នុងចំណីដែលមានត្រូវការ។
វិធីល្អបំផុត៖
- ប្រមូលចកបាយទាថ្មីៗ
- សម្ងួតវាឲ្យស្ងួតល្អ និងស្អាត
- បុកឲ្យម៉ត់ជាម្សៅ
- លាយចូលក្នុងចំណីមាន់ប្រហែល ៥%–១០%
ការប្រើប្រាស់ក្នុងកម្រិតនេះអាចជួយកាត់បន្ថយការចំណាយដោយមិនប៉ះពាល់ដល់ការលូតលាស់។
ការប្រើប្រាស់តាមដំណាក់កាលមាន់
- មាន់សាច់៖ គួរប្រើច្រើននៅដំណាក់កាល លូតលាស់ និងធំធាត់
- កូនមាន់តូចៗ៖ មិនគួរប្រើច្រើនពេក ព្រោះអាចធ្វើឲ្យកូនមាន់លូតលាស់យឺត
គួរជៀសវាង
កសិករមួយចំនួនអាចមានការភាន់ច្រឡំ ដោយផ្តល់ចកបាយទាស្រស់ច្រើនពេកភ្លាមៗឲ្យមាន់ស៊ី ដែលអាចអាចធ្វើឲ្យមាន់មិនចង់ស៊ី។
ដំណោះស្រាយ៖
- ត្រូវសម្ងួត និងបុកជាម្សៅជាមុន
- ចាប់ផ្តើមបន្ថែមបន្តិចម្តងៗ
- ទុកឲ្យមាន់សម្របខ្លួនទៅនឹងរសជាតិថ្មី
ចកបាយទា (Azolla) គឺជាជម្រើសឆ្លាតវៃសម្រាប់កសិករចិញ្ចឹមមាន់ ដែលចង់កាត់បន្ថយការចំណាយ និងបង្កើនប្រសិទ្ធភាពផលិតកម្ម។ ដោយប្រើប្រាស់វាឲ្យត្រឹមត្រូវ និងមានវិធីសាស្ត្រល្អ អ្នកអាចទទួលបានទាំងការសន្សំថវិកា និងការលូតលាស់មាន់ល្អប្រសើរ។ចាប់ផ្តើមសាកល្បងថ្ងៃនេះ ហើយអ្នកអាចឃើញភាពខុសគ្នានៅក្នុងចំណាយ និងផលលទ្ធផលក្នុងរយៈពេលខ្លី៕
ដោយ៖ សែន តុលា
ប្រភព៖ Poultry Tips / NIH