ថ្នាំសម្លាប់ស្មៅ មានប្រយោជន៍ក្នុងការគ្រប់គ្រងស្មៅ ប៉ុន្តែប្រសិនបើវាបន្តនៅក្នុងដីយូរជាងការរំពឹងទុក សំណល់ទាំងនោះអាចជះឥទ្ធិពលអវិជ្ជមានយ៉ាងខ្លាំងដល់ដំណាំបន្ទាប់។ មូលហេតុដែលបណ្តាលឱ្យថ្នាំទាំងនេះនៅសេសសល់ក្នុងដីយូរ រួមមានលក្ខខណ្ឌអាកាសធាតុ ប្រភេទដី កម្រិតនៃការប្រើប្រាស់ថ្នាំ និងការរលាយសាបសូន្យក្នុងដីមានសភាពយឺតយ៉ាវ ដែលនាំឱ្យដំណាំពិបាកដុះ និងថយចុះផលិតភាព។
រោគសញ្ញានៃការប៉ះពាល់នឹងសំណល់ថ្នាំសម្លាប់ស្មៅ
បងប្អូនកសិករគួរសង្កេតមើលរោគសញ្ញាទាំងនេះលើដំណាំ៖
- ដំណុះមិនល្អ៖ ពន្លកដុះយឺត ឬមិនស្មើគ្នា អត្រាគ្រាប់ពូជដុះមានកម្រិតទាប និងកូនដំណាំមានសភាពខ្សោយផុយស្រួយ។
- ការអភិវឌ្ឍឫសខុសប្រក្រតី៖ ឫសមានសភាពកាច់ ឬខ្លី ឫសមិនសូវបែកមែក ដែលធ្វើឱ្យការស្រូបយកទឹក និងសារធាតុចិញ្ចឹមមានការថយចុះ។
- ភាពតានតឹងដោយសារសារធាតុគីមី៖ ស្លឹករួញ ឬខូចទ្រង់ទ្រាយ មានស្លឹកពណ៌លឿង ឬមានស្នាមដាច់ដានតូចៗ រួមទាំងការលូតលាស់មិនពេញលេញ។
- ការរាំងស្ទះដល់ការលូតលាស់៖ កន្លែងបែកមែកខ្លីៗ ស្លឹកដុះកញ្ចុំគ្នាខ្លាំងពេក រារាំងដល់ការចេញផ្កា និងផ្លែ ដែលធ្វើឱ្យទិន្នផលធ្លាក់ចុះ។
កត្តាដែលធ្វើឱ្យថ្នាំសម្លាប់ស្មៅសេសសល់ក្នុងដីយូរ
កត្តាដែលបង្កើនហានិភ័យនៃសំណល់ថ្នាំរួមមាន៖
- សកម្មភាពអតិសុខុមប្រាណក្នុងដីមានកម្រិតទាប។
- ស្ថានភាពអាកាសធាតុស្ងួត ឬត្រជាក់ពេក។
- ការប្រើប្រាស់ថ្នាំក្នុងកម្រិតខ្ពស់ពេក។
- កត្តា pH នៃដី និងកម្រិតសារធាតុសរីរាង្គក្នុងដី។
- ការបង្ហូរទឹកមិនបានល្អ និងកង្វះទឹកភ្លៀង។
វិធីសាស្ត្រកាត់បន្ថយហានិភ័យ
ដើម្បីធានាបាននូវសុខភាពដី និងដំណាំ បងប្អូនគួរអនុវត្តដូចខាងក្រោម៖
- ត្រូវអនុវត្តតាមកម្រិតថ្នាំដែលបានណែនាំ និងអានស្លាកសញ្ញាឱ្យបានច្បាស់លាស់។
- គោរពតាមការណែនាំអំពីការប្តូរដំណាំដាំដុះ មុនពេលដាំដំណាំដែលងាយរងគ្រោះ។
- បង្កើនសារធាតុសរីរាង្គក្នុងដី ដើម្បីជួយដល់អតិសុខុមប្រាណដែលមានប្រយោជន៍។
- រក្សាសំណើមដីឱ្យបានត្រឹមត្រូវ ដើម្បីជួយឱ្យថ្នាំសម្លាប់ស្មៅបំបែកខ្លួនបានលឿន។
- ប្តូរប្រភេទថ្នាំសម្លាប់ស្មៅដែលមានយន្តការសកម្មភាពខុសៗគ្នា។
- តាមដានចម្ការជាប្រចាំ ដើម្បីរកឱ្យឃើញរោគសញ្ញានៃការប៉ះពាល់ថ្នាំតាំងពីដំណាក់កាលដំបូង។ សូមប្រឹក្សាជាមួយមន្ត្រីកសិកម្មឃុំ ដើម្បីដឹងពីវិធីប្រើប្រាស់ថ្នាំសម្លាប់ស្មៅបានត្រឹមត្រូវ។
ដីដែលមានសុខភាពល្អ គឺជាគ្រឹះនៃដំណាំដែលមានសុខភាពល្អ។ ការជ្រើសរើសថ្នាំសម្លាប់ស្មៅឱ្យបានត្រឹមត្រូវ ការប្រើប្រាស់ដោយការទទួលខុសត្រូវ និងការគ្រប់គ្រងដីបានល្អ នឹងជួយកាត់បន្ថយបញ្ហាសំណល់ថ្នាំ ធានាបាននូវការដុះលូតលាស់ល្អរបស់ដំណាំ និងបង្កើនទិន្នផលខ្ពស់៕
ដោយ៖ ចាន់ តារា
ប្រភព៖ Gulab orchard shilaroo/ FAO